Pasditen e sotme, kryeministri Rama prezantoi paketën e zgjeruar ekonomike që do t’i vijë në ndihmë qytetarëve dhe bizneseve. (Lexo këtu)
Pas prezantimit të paketës, kryeministri dha gjithashtu një lajm të mirë për shqiptarët e mbetur jashtë kufijve.
Pasi tha se riatdhesimi i shqiptarëve përbën rrezik infektimi për të tjerët, Rama ka ndryshuar vendimin e tij.
Riatdhesimi i vendasve të mbetur jashtë kufijve do të nisë këtë javë, me kushtin që të karantinohen për 14 ditë në hotelet e përzgjedhura nga qeveria, por pagesën do e bëjnë ata.
“Iu kërkoj qytetarëve në kushtet e pamundësisë që s’po kthehen në Atdhe një ndjesë të madhe, por turp atyre që luajnë patriotash a demokratësh. Në këtë situatë të flasësh për bijtë e shqipes që i janë prerë duart nga diktatura e Ramës, kur ne e kemi marrë këtë masë për një armik të padukshëm që do na kishte grirë po të mos merreshin masat, do të thotë të nxisësh infektimin. Dua të them se po punohet dhe brenda kësaj jave, pra diku nga e shtuna do rinisim fluturimet për riatdhesime. Do të nisim nga Roma, qytetarët duhet të prenotojnë vetë biletën po ashtu edhe hotelin për qëndrim deri sa të vijë avioni.”- njoftoi kryeministri.
