Kryeministri Rama ka bërë vazhdimisht fushatë kundër HEC-eve në Shqipëri, për të arritur qëllimin e tij të cilin e ka përmbushur së fundmi.
Kriza e energjisë që ka kapluar vendin tashmë po “djeg” buxhetin e shtetit ndërsa shqiptarët janë në gjendje më të vështirë se kurrë.
Së fundmi, qeveria ka miratuar fondin e dytë për KESH për të siguruar likuiditet dhe për të përballuar importet e kushtueshme. Në fletoren zyrtare është publikuar vendimi i qeverisë ku në dispozicion të KESH vihet pagesa e dytë prej 8 miliardë lekësh për të përballuar furnizimin me energji, pavarësisht çmimeve të larta të importit. Ky fond përballohet nga buxheti i vënë në dispozicion për sektorin energjetik në kushtet e krizës globale.
Ky është transhi i dytë që miratohet për t’ju thënë KESH, ndërsa më herët me vendim të datës 29 korrik 2022, u miratua edhe pagesa e parë po në vlerën 8 miliardë lekë. Në total qeveria ka vënë në dispozicion të Korporatës Elektro-energjetike për këtë vit për të përballuar krizën e energjisë 28 miliardë lekë, ndërsa deri më tani vlera e importeve të energjisë nga bursa ndërkombëtare nga janari deri më tani e ka kapërcyer shifrën prej 300 milionë eurosh.
Gjatë këtij viti çmimi për megavat ka arritur mbi 1 mijë euro, ndërsa vlera më e lartë me të cilën është importuar energjia nga KESH ka qenë 521 euro një megavat.
Prej janarit të këtij viti e deri më tani janë importuar mbi më shumë se 300 milionë euro energji elektrike nga KESH, ndërkohë që çmimi për megavat ka arritur në shifra rekord prej mbi 500 euro. Rreth 50 milionë euro janë shpenzuar për të garantuar furnizim me energji elektrike vetëm në 2 javët e para të muajit gusht.
Për të shmangur rritjen e mëtejshme të faturës financiare për të blerë energji, qeveria ka vendosur që prej 1 tetorit të gjitha familjet që konsumojnë mbi 800 kilovat në muaj do të paguajnë 42 lekë për kilovat dhe jo më 9.5 lekë/kilovati siç aktualisht po ndodh.
Burimi: Shqiptarja.com
