Në Komitetin Teknik të Ekspertëve në mbledhjen e zhvilluar një ditë më parë, është diskutuar për mbylljen e lokaleve të zonës së ish-Bllokut. Megjithëse ende nuk ka një vendim zyrtar, zv. Ministrja Mira Rakacolli u shpreh se në këto lokale shkelen hapur masat e vendosura nga qeveria për parandalimin e përhapjes së Covid-19.
“E para njëherë kjo nuk është ende një masë, por është një diskutim. E kemi hedhur në vlerësim një gjë të tillë, dhe vlerësimi është një gjë e peshuar mirë. Do të shikojmë se si do të jetë situata. Nuk është diçka vendimtare, siç ka qenë për universitetet.
Sepse nga kontrollet që janë bërë dhe nga masat që janë marrë, për shembull, u vendos maska e detyruar, një pjesë e respektojnë e një pjesë jo, po ashtu edhe për distancën. Nga inspektimet që janë bërë, kryesisht në lokalet e ish-Bllokut, është parë që përqendrimi i njerëzve ka qenë shumë më i madh dhe ka pasur moszbatim të rregullave që kemi vendosur. Njerëzit duhet të ndërgjegjësohen sepse situata është shumë serioze”, deklaroi Rakacolli për Oranews.
/GazetaReforma.com/
