Qytetarët e Tiranës dhe të zonave përreth duke filluar nga dita e sotme nuk do të kenë më nevojë të presin në radhë për të marrë një dokument. Tashmë ata mund t’i tërheqin dokumentet që dëshirojnë në çdo kohë, madje dhe në fundjavë. Njësitë administrative të Tiranës ofrojnë mundësinë që nëpërmjet shërbimit e-kiosk, të tërheqësh në pak minuta një certifikatë, leje apo aplikosh për një kërkesë në Bashkinë e Tiranës.
Kryebashkiaku Erion Veliaj ishte në Njësinë Administrative 5 të Tiranës, për të përuruar shërbimin e ri të e-kioskave, që do të funksionojë pranë të gjitha njësive administrative.
“Jam shumë i lumtur që fillojmë një projekt pilot si e-kioska. Ndonjëherë harrojmë se koha që kalojmë në radhë, po mblidhet, është baras me 9 ditë në vit. Pra, 9 ditë ia kushtojmë radhës për të marrë një dokument, që fare mirë mund të printohet nga shtëpia, në faqen e internetit ekioksa.al, ose mund të printohet në kioskat e shërbimit të kompjuterizuara, pranë njësive tona të qeverisjes vendore”, theksoi Veliaj.
Ky shërbim i ri do të jetë aktin 24 orë dhe në dy gjuhë: shqip dhe anglisht. Kjo tekonologji inovative shmang radhët e gjata në institucionet zyrtare dhe iu lejon qytetarëve të tërheqin me shpejtësi dokumentet që iu duhen.
Kryebashkiaku Veliaj u shpreh se tashmë qytetarët do të mund të marrin në këto njësi 47 nga 70 shërbime që ofrohen nga Bashkia e Tiranës.
“Në pak minuta, pa pagesë, shumicën e këtyre aplikimeve, si aplikimi për hapësirë publike, për licencë taksie, për akses në rrugë, për aktivitete politike, protesta, mitingje, koncerte, pra më shumë se 60% e shërbimeve që ofrohen në sportelin e bashkisë, fare mirë mund të aksesohen përmes e-kioskës”,- tha Veliaj.
Ky shërbim funksionon duke u identifikuar përmes skanimit të letërnjoftimit nga pajisja përkatëse. Më pas qytetari zgjedh shërbimin e dëshiruar dhe e-kioska printon dokumentin.
“Në frymën e modernizimit të Bashkisë së Tiranës, si me aplikacionin Tirana ime apo parkimi me SMS, kjo është një risi që i shtohet gamës së produkteve, që fare mirë mund të bëhen në mënyrë elektronike, jashtë radhe. Për ata që kanë një printer në shtëpi apo në punë, ekioska.al, ka të gjitha shërbimet e Bashkisë së Tiranës që ofrohen edhe këtu. Për ata që nuk kanë, mjafton të vijnë këtu, pa asnjë pagesë, të vendosin kartën e tyre të identitetit dhe pastaj marrin të gjitha shërbimet, për të cilat tradicionalisht është mbajtur radhë”, u shpreh kryebashkiaku.
Veliaj tha se Bashkia e Tiranës, bashkë me Qeverinë, po i kushtojnë vëmendje modernizimit të shërbimeve duke shfrytëzuar teknologjinë e re.
