Qeveria ka marrë vendimin për të lënë të lirë nga puna një nga prindërit që do të kujdeset për fëmijët në këtë periudhë të vështirë kur po përballemi me raste në rritje të të infektuarve me Koronavirus.
Pas vendimit për mbylljen me dy javë të institucioneve arsimore në vend, Këshilli i Ministrave ka vendosur që njëri nga prindërit të marrë leje për t’u kujdesur për fëmijën në shtëpi.
Sipas vendimit të qeverisë, nga data 10 deri më 23 mars, prindërit do të jenë të lirë nga puna dhe do të kujdesen për fëmijët.
Kush do të përfitojë?
Pjesë e këtij vendimi janë jo vetëm prindërit e punësuar në administratën shtetërore, por edhe ata në sektorin privat.
Nga vendimi do të përfitojnë prindërit që punojnë në sektorin publik në nivel qendror dhe lokal, të cilët kanë fëmijë në çerdhe, kopësht dhe parashkollor.
Gjithashtu, qeveria i kërkon sektorit privat që të lejojë të njëjtën gjë për njëri nga prindërit me qëllim mbajtjen e fëmijëve.
Vendimi vjen pas identifikimit të 10 rasteve me Koronavirus në vendin tonë, tre prej të cilëve ndodhen të shtruar te Infektivi, një në spitalin e Durrësit dhe të tjerët të izoluar në shtëpi pa simptoma.
/ABC News
