Këshilli i Ministrave ka vendosur në mbledhjen e sotme që të ndihmojë bizneset që duhet të zbatojnë protokollet e sigurisë për parandalimin e përhapjes së Covid-19 në ambientet e punës.
Shuma fikse do të jetë 4 000 (katër mijë) lekë për çdo punonjës, e llogaritur për dymujorin nëntor-dhjetor 2020, respektivisht 2 000 (dy mijë) lekë për çdo muaj. Në VKM shkruhet se bizneset që nuk përfitojnë nga kjo ndihmë do të jenë ato që nuk rezultojnë aktive në datën e hyrjes në fuqi të vendimit e që nuk kanë dorëzuar deklaratë vjetore për vitin 2019 (tatim i fitimit ose tatim i thjeshtuar mbi fitimin).
Në total kjo mini-paketë do i kushtojë shtetit 187 092 000 lekë, që i merr nga programi i nxitjes së punësimit. Ndihma financiare u jepet ndërmarrjeve për të mbuluar një pjesë të shpenzimeve, për të zbatuar protokollet në kuadër të pandemisë COVID-19, bazuar në numrin e të punësuarve.
Bizneset që duan të përfitojnë ndihmën e qeverisë duhet të aplikojnë duke deklaruar: NIPT-in e përfituesit; numrin total të punonjësve për të cilët përfiton subjekti; bankën, ku përfituesi ka llogarinë rrjedhëse bankare; IBAN-in e llogarisë bankare.
Franca, Gjermania plan konkret në ndihmë të bizneseve
Gjermania ka vendosur që me mbylljen e dytë bizneseve të vogla mund t’u rimbursohet deri në 75 përqind të xhiros së humbur, bizneseve më të mëdha deri në 70 përqind. Ndërkohë ligjvënësit francezë javën e kaluar miratuan një paketë të re prej 100 miliardë eurosh për të forcuar ekonominë e vendit, bizneset e goditura më shumë nga izolimi i ri do të marrin 10,000 euro në muaj dhe listat e pagave të tyre do të kombëtarizohen në mënyrë efektive në mënyrë që punonjësit që nuk mund të punojnë të mund të mbajnë punën e tyre.
Shqipëria nuk ka ende asnjë plan gati!
Ndërkohë qeveria jonë, përveç fasadës së mësipërme, nuk ka marrë asnjë masë ekonomike nëse do të kemi një mbyllje të dytë. Ministrja e financave, Anila Denaj, ka deklaruar se nuk ka buxhet për ndonjë situatë emergjente dhe se e vetmja gjë që mund të bëhet për bizneset në rast të ndonjë mbylljeje të dytë është shtyrja e deklarimeve tatimore apo shtyrjen e pagesave të detyrimeve.
Kjo do të thotë se nëse do të kemi një tjetër karantinë, shteti shqiptar nuk do të dijë nga të rrotullohet më parë, sepse nuk ka asnjë plan gati. Nëse do të ndodhe kjo gjë, me siguri do të gjendemi përballë një situatë të ngjashme si pak muaj më parë, kur shumica e bizneseve shkuan drejt falimentit. (Kliko)
Biznesi i vogël ishte një nga sektorët më të prekur gjatë izolimit të vendit dhe pasojat vazhdojnë t’i ndjejnë ende edhe pas rihapjes. Iconstyle.al ka ndjekur me shqetësim të gjitha problematikat që i kanë shoqëruar gjatë kësaj kohe, duke nisur nga vendosja e gjobave selektive e deri tek mungesa e mbështetjes nga qeveria.
Por si të mos mjaftonin vetëm këto, taksat tepër të larta po i çojnë çdo ditë e më tepër këto biznese drejt falimentimit. Pronarët e tyre kanë treguar se janë përfshirë në skemën vrastare të taksave dhe duhet të vuajnë vetë të gjitha pasojat. Atyre ju duhet t’i pagujanë shtetit të njëjtat taksa si një pjesë e madhe e bizneseve të mëdha dhe askush nuk mendon se sa të vështirë ua bën kjo fitimin.
Pandemia gjunjëzoi totalisht biznesin e vogël
Duke ditur që këto biznese janë ato që përcaktojnë ekonominë shqiptare, qeveria nuk i përkrahu dhe as i stimuloi me paketa ndihme që të vijonin aktivitetin në këtë kohë të vështirë. Që nga momenti i izolimit të vendit dhe ende sot e kësaj dite ka njoftime të shumta për mbylljen e biznesit të vogël apo shitjen e pajisjeve të tyre.
Para pak muajsh burime pranë “icontyle.al” bënë të ditur se 3-5 biznese mbyllen çdo ditë dhe kjo mendohet se është vetëm vala e parë e falimentimeve. (Lexo këtu) Përveç kësaj qindra biznese të vogla janë ndëshkuar me gjoba të majme, për shkak të organizimit të dasmave apo mosndalimit të muzikës pas orës 20:00. Por sigurisht edhe në këtë rast policia ka bërë një sy qorr e një vesh shurdh kur vjen puna tek më të mëdhenjtë, të cilëve nuk guxojnë as t’u ndalojnë tek dera e lokalit edhe kur shkelin protokollin e Covid-19. (Lexo Këtu)
