Me rastin e festave të fundvitit çdo pensionist dhe fëmijë në Kosovë do të marrë nga 100 euro shpërblim, pavarësisht të ardhurave të familjes.
Lajmi është bërë me dije nga kryeministri Albin Kurti.
Kreu i qeverisë së Kosovës tha se vendimi për subvencionimin e të gjithë fëmijëve me nga 100 euro është një premtim i mbajtur nga ai.
“Besoj ju kujtohet premtimi që çdo vit secili fëmijë do të përfitojë 50, 100 apo 150 euro, varësisht nga të ardhurat e prindërve. Sivjet kemi vendosur që të gjithë fëmijët pa dallim të përfitojnë nga skema dhe shuma e përfitimit të jetë 100 euro”, tha Kurti.
Sa i takon bonusit për pensionistët, Kurti tha se po bëhet që në këtë fundvit të lehtësohet kostoja e jetesës për ta.
“Që në këtë vit nuk kemi harruar as pensionistët tanë, po ashtu do të përkujdesemi me një vendim tjetër. Prandaj, për të gjithë pensionistët, këtë fundvit, me qëllim të lehtësimit të kostos së jetesës, për këtë kategori të cenueshme, do të miratojmë shtesën e njëhershme prej 100 euro, përvec pensionit të rregullt mujor që marrin”, përfundoi Kurti.
Nëse bëjmë një krahasim më Shqipërinë, jemi shumë pas. Qeveria jonë ka miratuar një shpërblim për pensionistët për rastin e festave të fundvitit prej vetëm 5 mijë lekësh të reja.
Siç janë shprehur shpesh qytetarët kjo nuk mjafton as për gjelin e detit, marrë parasysh rritjen e çmendur të çmimeve.
Nga ana tjetër në krahasim me Kosovën, qeveria shqiptare nuk shpërblen fëmijët dhe ende asnjë paketë ndihme për shtresën në nevojë.
