King Valentino Corleone i cili njihet në rrjetet sociale me nofkën Vali Corleone, u plagos ditën e djeshme me armë zjarri.
Gjykata e Gjilanit vendosi masën arrest me burg për Anita Sylën, 22-vjeçaren e cila qëlloi me armë Corleonen në banesën ku dyshja bashkëjetonin prej kohësh. Gjykata Themelore në Gjilan ka caktuar masën e paraburgimit me 30 ditë për Sylën.
Në njoftim thuhet se Syla në ambient familjar, në prezencë edhe personave të tjerë ka tentuar ta vrasë Corleonen. Ajo ka qëlluar me armë zjarri, pistoletë duke e plagosur të dashurin e saj në këmbën e djathtë.
Në njoftimin e Gjykatës së Gjilanit thuhet se “ekziston dyshimi i bazuar se e pandehura në ambient familjar, në prezencë edhe personave të tjerë ka tentuar të privoj nga jeta tani të dëmtuarin P. C., në atë mënyrë që derisa kanë qenë duke ndenjur në dhomën e ndejës, ka shkrepë me armë zjarri – pistoletë duke goditur të dëmtuarin në këmbën e djathtë të këmbës, me ç’rast i shkakton dëmtime trupore dhe i njëjti detyrohet të kërkojë ndihmë mjekësore në Spitalin Regjional të Gjilanit.
Me këto veprime e pandehura dyshohet se ka kryer veprat penale, vrasje në tentativë dhe mbajtja në pronësi, kontroll ose posedim të paautorizuar të armëve, vepra të sanksionuara me Kodin Penal të Republikës së Kosovës (KPRK)”, thuhet në njoftim.
Gjyqtari i procedurës paraprake ka konsideruar se janë plotësuar kushtet ligjore për caktimin e masës së paraburgimit ndaj të pandehurës, ngase masat tjera alternative do të ishin të pamjaftueshme për zhvillimin me sukses të procedurës penale.
Palët kanë të drejtën e ankesës ndaj të këtij vendimi mbi caktimin e paraburgimit në Gjykatën e Apelit.”
