Një e moshuar nga Durrësi u vra nga nipi i saj 21-vjeçar me thikë, me të cilin jetonte në një shtëpi. Ngjarja e rëndë u shënua mesditën e së enjtes, kur 81-vjeçarja Floresha Shkurti u gjet e vdekur në banesën e saj.
Ndërsa fillimisht dyshohej se Floresha Shkurti humbi jetën nga shkaqe natyrore, policia zbuloi më pas se bëhej fjalë për një vrasje dhe autori është nipi i saj 21-vjeçar, Redmon Gruda.
Ky i fundit e goditi disa herë me thikë në kokë gjyshen e tij, ndërsa e moshuara nuk mundi t’u mbijetonte plagëve të marra dhe gjeti vdekjen e menjëhershme.
“BalkanWeb” publikon foto të autorit të ngjarjes së rëndë, Redmon Grudës, i cili tashmë ndodhet pas hekurave. I riu pranoi autorësinë e krimit, ndërsa shtoi se me gjyshen kishte pasur disa herë debate.
Në raportin e policisë shkruhet se ngjarja ndodhi për motive të dobëta, ndërsa 21-vjeçari Redmon Gruda do të gjykohet për veprën penale të “vrasjes për shkak të marrëdhënieve familjare”.
Burimi: BalkanWeb
