Aktorja dhe këngëtarja meksikane u qëllua për vdekje ndërkohë që priste të merrte nga stërvitja e futbollit djalin e saj 11-vjeçar.
Tania Mendoza ishte jashtë kompleksit sportiv të qytetit të Cuernavaca bashkë me prindër të tjerë në momentin që u afruan dy burra të armatosur me motoçikletë.
Njeri prej tyre qëlloi disa herë para se të largohej me bashkëpuntorin e tij.
Mendoza, 42 vjeç, u bë e famshme në vitin 2005 pas rolit kryesor në filmin “La Mera Reyna del Sur”. Ajo ishte shfaqur edhe në një sërë telenovelash, por vitet e fundit iu përkushtua karrierës së saj si këngëtare dhe regjistroi pesë albume.
Në vitin 2010, ajo ishte rrëmbyer bashkë me burrin dhe të birin, që ishte vetëm 6-muajsh. Që nga ajo kohë, Mendoza kishte raportuar tek autoritetet disa kërcënime me vdekje.
Ende nuk është e qartë se kush qëndron prapa vrasjes së saj dhe cili është motivi. Pas të shtënave, policia kreu një operacion kërkimi për të dyshuarit, por nuk u arrestua asnjë person.
Meksika për një kohë të gjatë përballet me nivel të lartë të krimit, kryesisht të lidhur me bandat e drogës dhe vrasjet e grave. Sipas të dhënave zyrtare, në Meksikë vitin e kaluar janë vrarë mesatarisht nga 10 gra në ditë.
