Së fundmi, portalet, rrjetet sociale e përfshirë këtu edhe inbox-i ynë, janë pushtuar nga lajmi se Kim Kardashian, në festën e ditëlindjes së mikut të saj John Legend, ka kopjuar veshjen e këngëtares shqiptare Kida. Po, po Kim kopjon Kidën! Dhe me të drejtë, dikush që i hedh një shikim të shpejtë, sheh se Kida, po të njëjtën veshje, e ka pasur që më 28 dhjetor në postimin ku promovon këngën “Ka je”, ndërkohë që Kim e ka veshur 4 ditë më parë.
Bëhet fjalë për një trupore tepër sexy prej dantelle të zezë thuajse transparente, që në pjesën e belit ka të lidhur atë që duket si një bluzë e gjatë e zezë, teksa në pjesën e gjoksit ka tre kapje që ekspozojnë dekoltenë duke e bërë veshjen tepër joshëse.
Pra sipas diferencës kohore, gjithçka bën sens… Por sa janë gjasat që Kim Kardashian vërtet të ketë hapur Instagram-in, t’i ketë dalë përpara fotoja e Kidës (me gjithë respektin pë Kidën) dhe t’i ketë thënë mikut të saj, njëkohësisht stilist me famë botërore, Alexander Wang: “Ja Alex, më bëj një të tillë për ditëlindjen e John!”? Le të themi që janë pranë zeros… Dhe në këtë rast, emrat që duhet të vihen në diskutim, nuk janë aspak Kida dhe Kim, e cila ka një ushtri stilistësh gati për ta veshur, por ata që qëndrojnë pas imazhit të tyre, konkretisht stilisti Alexander Wang dhe stilistja që ka realizuar veshjen e Kidës, Diana Qerimi.
Mjafton një kërkim i vogël në internet për të mësuar se veshjen në fjalë, Wang e ka prezantuar në koleksionin e tij “vjeshtë 2019” më 1 dhjetor 2018 dhe në një rastësi “fatkeqe” për stilisten shqiptare, fati deshi që pikërisht kjo veshje të zgjidhej nga Kim Kardashian për eventin, fotot e së cilit bënë xhiron e rrjeteve sociale.
Siç shihet qartë, ndonëse në pamje të parë veshja duket identike, detaje si lulet e dantellës, numri i kapjeve në dekolte si dhe qepja në pjesën e supit që tek dantella kërkon mjeshtëri të vërtetë, tregojnë diferencat e vërteta mes dy krijimeve, ku dhe kuptohet se cila është kopja e cila origjinali. Dhe në mes të një mish-mashi lajmesh e postimesh, stilistja mesa duket ka shijuar 5-minutëshin e vet të famës, duke shpresuar ndoshta se ky detaj i vogël nuk do dilte në dritë.
