Deklarata e ministres së Shëndetësisë ditën e djeshme për rihapjen e transportit publik ka shkaktuar koas mes Shoqatave të Transportit, që duket se janë ndarë në dy kampe: ata që do rinisën punën ditën e sotme dhe të tjerët që refuzojnë.(Lexo këtu)
Këtë mëngjes punonjësit e transportit publik në Tiranë janë mbledhur për të protestuar përpara Ministrisë së Infrastrukturës dhe Transporteve, ku kërkojnë një tjetër pagë lufte.
Ndërkohë protestuesit nuk po lejohen nga policia për të vijuar protestën dhe mësohet se deri më tani në polici janë shoqëruar 5 persona për tubim të paligjshëm.
Bëhet me dije se Policia nuk i lejon që të protestojnë, sepse është kundër rregullave të Covid-19, të lëna në fuqi nga qeveria disa ditë më parë.
Kujtojmë se sipas udhëzimit të ministres së Shëndetësisë Ogerta Manastirliu dhe asaj të Transporteve Belinda Balluku nga dita e sotme është hapur transporti publik.
Mirëpo, mëngjesi i sotëm e gjeti kryeqytetin sërish pa autobusë-urbanë, pasi sipas tyre është e pamundur të punojnë me kushtet që janë vënë nga ministria.
Po çfarë kërkohet për rifillimin e punës?
Punonjësit e transportit publik në vend kërkojnë heqjen e akcizës për naftën, rimbursim dhe një pagë të dytë lufte prej 40 mijë lekësh.
Për plotësimin e kushteve të tyre, ata kanë zhvilluar edhe disa protesta, të cilat janë shpërndarë nga Policia për shkak të masave të marra ndaj koronavirusit.
