Për të shijuar plazhet shqiptare po bëhet gjithnjë e më e thjeshtë dhe komode. Pas projektit të “Lungo Mare”-s në Vlorë, që përfundoi vitin e kaluar, qeveria shqiptare po synon që të lehtësojë lëvizjen e pushuesve që frekuentojnë plazhin e Durrësit gjatë fundjavës, si dhe të krijojë një lidhje mes Shëngjinit dhe Velipojës.
Punimet në autostradën Tiranë-Durrës
Policia Rrugore njoftoi se ditën e premte, më 15 qershor në orën 12:00, përfundon ndërhyrja në segmentin Vorë-Maminas. Nga dita e premte deri mëngjesin e së hënës, ora 06:00, aksi rrugor Tiranë-Durrës do të jetë i hapur për kalimin e mjeteve në të dyja drejtimet.
Ditën e hënë në orën 06:00 do të mbyllet segmenti Maminas-Sukth, ku do të vazhdojë ndërhyrja.
Projekti Shëngjin–Velipojë
Investimi me vlerë 3.8 miliardë lekë nga ana e qeverisë shqiptare u bë i ditur sot nga kryeministri Edi Rama. Ai njoftoi se rruga shkurton 14.8 kilometra dhe mund të përshkohet për 19 minuta.
“Mirëmëngjes, dhe me këto pamje të projektit të rrugës së shumëpritur turistike prej dekadash, Shëngjin-Velipojë, një aks panoramik që shkurton më shumë se një orë lidhjen mes tyre, hap perspektivën e zhvillimit të turizmit elitar, rrit ekonominë e punësimin në krejt zonën, ju uroj një ditë të bukur”, shkruan Rama, krah videos së publikuar në “Facebook”.
Nga Porti i Shëngjinit rruga i ngjitet shpatit me një lartësi 100-120 metra mbi nivelin e detit dhe ruan të paprekur plazhin e Shëngjinit, Ranën e Hedhun dhe plazhet e tjera të zonës, për t’u lidhur më pas me Velipojën.
Rruga Shëngjin-Velipojë do të vazhdojë deri në Pulaj në grykëderdhjen e Bunës për të hapur rrugën deri në Ulqin.
