Disa nga personazhet e njohur që njohim sot, nuk kanë qenë gjithmonë të famshëm dhe me emër në skenën shqiptare. Kur kanë qenë të rinj, me vullnet dhe dëshirë për të punuar, ata kanë bërë dhe punë që ndoshta nuk ishin ajo çfarë donin të bënin në jetën e tyre. Por, ky ka qenë vetëm fillimi, pasi koha dhe aftësitë kanë treguar që ata kanë arritur t’ia dalin dhe të shndërrohen në personazhe të suksesshëm.
Erion Veliaj
Kryetari i Bashkisë së Tiranës, Erion Veliaj duke folur për emisionin ‘Wake up’ në Top Channel ka rrëfyer vendin ku shiste fiq tek Pazari i Ri kur ishte i ri. “Këtu është dhe zona ku unë kam shitur fiq. Tani ajo nuk gjendet më! Unë jam me parimin, që askush nuk duhet të ndihet keq që në një moment të jetës ka bërë një punë të ndershme për të jetuar. Shumë njerëz e përflasin me humor këtë histori, por unë them që kushdo i ri që kërkon të eci përpara me punë, pavarësisht vështirësive që mund të ketë në familje, duhet ta bëjë këtë, sepse jetës asnjëherë nuk i dihet”.
Noizy
Para se të njihej si një nga “reperat më të mirë të shqiptarisë”, Noizy, ka qenë “luftëtar i rrugëve”, në Londër ku edhe jetoi si i ri. Ai kishte një ëndërr të madhe, atë të një boksieri profesionist por që si duket ai kurrë nuk e ka realizuar. “Profesioni tjetër që të mbeti ëndërr? “Boksi”, theksoi Noizy për emisionin Prive.
Behgjet Pacolli
Duket sikur biznesmenët më të mëdhenj në vend, duke përfshirë këtu dhe Behgjet Pacollin, e kanë nisur të gjithë nga një pikë. Më pak para në xhep, por me një guxim që dallon sipërmarrësit më të suksesshëm, Pacolli ka arritur të shndërrohet në një nga njerëzit më të pasur, në trojet shqiptare. Në një intervistë për “Opinion”, ai ka treguar sesi ia doli në Gjermani me ndihmën e një pronari të një lokali, në kohën kur nuk dinte as gjuhën. ”U ula aty dhe ai më dha jo një, por dy pica me Coca-Cola. Më pas, unë e ndihmova të fshinte lokalin dhe kështu u bëmë pak miq. Kuptova që ai ishte shefi i lokalit dhe më tha se do më ndihmonte. Më punësoi aty rreth tre muaj dhe më ndihmoi të regjistrohesha në kursin e gjuhës gjermane”, tregon sipërmarrësi i njohur.
Sinan Hoxha
Është padyshim një nga këngëtarët më të kërkuar jo vetëm në Shqipëri, por kudo ku jetojnë shqiptarë. Prej më shumë se 15 vjet në skenë, Sinan Hoxha është kthyer në artistin e dashur dhe të suksesshëm, por në fillimet e tij, puna që bënte, s’kishte aspak lidhje me skenën. Në emisionin “Xing” ai ka zbuluar se dikur zotëronte një furrë buke. “Kam punuar furrxhi, bëja bukë”, ka thënë këngëtari.
Dua Lipa
Suksesi i saj del jashtë kufijve të Shqipërisë dhe në një periudhë kohore prej dy vitesh ajo tregoi se talenti dhe puna shpërblehen. Por, Dua Lipa ka ditur të bëjë dhe punë të tjera, ku jo domosdoshmërish i duhej të tregonte fuqinë vokale. “Kam punuar si mikpritëse e të ftuarve në një restorant meksikan, megjithëse kurrë nuk më kanë pëlqyer restorantet meksikane. Shumë njerëzit deheshin, dhe pikërisht në ato momente më vinte të hiqja dorë nga ajo punë”, ka thënë Dua për revistën “Spin”.
Agron Llakaj
E ka filluar punën që në moshën 13-vjeçare, por humorin e ka patur gjithmonë pikë të fortë. Aktori i njohur Agron Llakaj, ka punuar kur ishte shumë i ri në ndërtim dhe më pas në minierën e qymyrgurit në Memaliaj. Siç tregon vetë aktori, kjo punë ishtë shumë e vështirë dhe e mundimshme, por i mësoi atij vlerën e të punuarit. Sot, Agron Llakaj është një nga fytyrat më të dashura të ekranit për të gjitha moshat.
Ermal Mamaqi
Në një intervistë prekëse për Arjan Çanin, Ermal Mamaqi ka dalë jashtë kornizës së tij si humorist, për të rrëfyer fëmijërinë e vështirë. Ai ka zbuluar se pas pezullimit nga puna të së ëmës, Ermali, vetëm 12 vjeç, është detyruar të punojë si shitës cigaresh në rrugë.
