Ministrja e Arsimit i është përgjigjur pyetjes së shumë mësuesve për bonuset në kohë pandemie.
Duke theksuar se këtë çështje e ka adresuar edhe më parë, Besa Shahini shprehet se infermierët dhe mjekët janë në linjën e parë të luftës kundër koronavirusit dhe më të rrezikuar se çdo njeri tjetër.
“Infermierët dhe mjekët janë në linjën e parë në front. Ata janë të rrezikuar, shëndeti i tyre është i rrezikuar sepse po punojnë në vatrat e infeksioneve. Ne të tjerët kemi punuar gjatë gjithë kohës, por kemi qenë të sigurt nëpër shtëpitë tona. Pra, nuk është rreziku i njëjtë që të konsiderojmë edhe intensitetin e punës ta kemi patur të njëjtë”.
Shahini tha se mësuesit duhet të tregohen më solidarë për sa kohë që nuk i kanë humbur pagat e tyre si shumë të tjerë që punojnë në sektorin privat dhe janë me pagë të plotë.
Në video-mesazh, Ministrja Shahini adreson edhe pyetjet se kur do të zhvillohen provimet e kualifikimit dhe kur do të zhvillohet provimet për portalin Mësues për Shqipërinë:
“Edhe provimet për kualifikimin e mësuesve, edhe provimet për portalin “Mësues për Shqipërinë”, do të zhvillohen në momentin e parë që kemi një dakordësim nga Task-Forca për koronavirusin se mund të mblidhemi nëpër sallat si ato që janë tek Qendra e Shërbimeve Arsimore (QSHA) ku kryhen këto provime. Nuk e kemi ende një vendim të tillë, po presim deri më 11 maj që të shohim nëse kjo hapja e cila ka ndodhur këto 2 javë ka një efekt negativ në përhapjen e koronavirusit. Nëse jo, atëherë do të shohim të marrim leje për të hapur edhe qendrat e provimeve dhe të vijojmë me provimet në vazhdimësi. Unë mendoj që këto provime nuk mund të zhvillohen para qershorit, por kjo është data e parë e mundshme. Por është e mundshme që të bëhen edhe në korrik pasi të mbyllim të gjitha detyrimet që kemi me Maturën Shtetërore. Sido që të jetë, ju njoftojmë në kohë që të keni mundësi të përgatiteni për të gjitha këto provime dhe të jeni në kohë me të gjitha detyrimet që mund të keni në këtë periudhë”, shprehet Ministrja Shahini.
