Cili mashkull mund të provokojë një nga liderët e “Hollywood”-it në një xhelozi të çmendur për bashkëshorten e tij të bukur, që më pas ta akuzojë me gjakun e tij?
Me siguri një mashkull i ri, i pashëm në kulmin e tij, jo një 61-vjeçar me pesë martesa të dështuara nga pas.
Por sërish është Billy Bob Thornton ai që thuhet se krijoi një lidhje me ish-bashkëshorten e Johnny Depp, 30-vjeçaren Amber Heard. Dyshja janë kolegë në filmin e fundit dhe pavarësisht ndryshimit 31-vjeçar të moshës aktori sërish ka “goditur” një tjetër romancë.
Me një sens humori të hollë, pamje të rrëmujshme dhe në dukje i rrezikshëm, aktori 61-vjeçar Billy Bob Thornton është një nga dilemat më të mëdha të “Hollywood”-it!
Fillimisht i njohur për martesën e pazakontë me Angelina Jolie gjatë periudhës kur ajo u njoh më së shumti për bukurinë e saj, Billy është Don Zhuani më i pazakontë që bota e të famshmëve ka njohur. Johnny Depp e akuzoi ish-bashkëshorten Amber se e kishte tradhtuar me Billy-n.
Mirëpo, e vërtetë ose jo, ku qëndron sekreti i 61-vjeçarit?
Ndonëse është thuajse gjithmonë i parruar, i veshur si mekanik, me tatuazhe të shumta në trup dhe me një pasion të çuditshëm për rripat e lëkurës dhe kapelat e bejsbollit, Thornton bën për vete gati çdo femër me të cilën ka kontakt. Flet ngadalë dhe është i sjellshëm.
Madje, sipas të gjitha grave që e kanë intervistuar, magjia qëndron tek kontakti me sy. Ai të shikon gjatë gjithë kohës në sy, gati të hipnotizon!
“Kam patur gjithmonë aftësinë për të folur qetë me vajzat. S’e di përse, por që në fillore edhe shoqet e mamasë më kishin qejf. Unë jam ai lloj mashkulli që besoj në dashurinë, e cila të detyron të vraposh në shi me njeriun e jetës dhe ta puthësh fort, derisa të dalë gjak nga buzët!”, thotë Billy.
Djali i një mësuesi dhe i mamaje që vuante nga çrregullimet mendore, Billy u rrit në varfërinë e Arkansasit. Pa energji elektrike apo dhe ujë, shpeshherë atij i duhej të ushqehej me ketrat që gjente në pyjet aty afër.
Para se të zhvendosej në Los Angeles për të nisur karrierën si aktor, ai ishte baterist në një bandë lokale. Bob dallohet lehtë midis turmës, pasi ka plot tatuazhe kudo nëpër trup, me anë të të cilave kujton ish-partneret. Pas njohjes me bashkëshorten aktuale, atij iu desh të hiqte emrin e “Angelina”-s duke e zëvendësuar atë me fjalën “paqe”.
Ai u martua fillimisht me Melissa Lee Gatlin në vitin 1978. “U dehëm, shkuam të luanim bouling dhe më pas u martuam”, tha Billy për martesën me gruan e tij të parë, e cila zgjati vetëm dy vjet.
61-vjeçari pati një martesë më të gjatë në vitin 1986 me Toni Lawrence, por pastaj sërish një martesë 2-vjeçare me Cynthia Williams në vitin 1990.
Tre vite më vonë, Thornton u martua me rusen Pietra Cherniak, me të cilën pati dhe dy fëmijë, ndërsa në vitin 2000 u martua me Jolie, pavarësisht që kishin 20 vite diferencë. Martesa me këtë të fundit ishte dhe padyshim më e çmendura. Ai introvert, ajo ekstroverte! Një marrëdhënie që shoqërohej me pasionin për gjakun, karriget elektrike dhe seksin në vende të pazakonta.
Parimi i Billy Bob Thornton është ky: “E dini si është puna? Unë i adhuroj femrat! I dua ato të gjitha. Jo gjithmonë jam dakord me gjërat që bëjnë, por gjithsesi i dua”.
Burimi: Daily Mail
