Sheqernat e shtuar janë ato që u shtohen ushqimeve gjatë përpunimit, përgatitjes ose më vonë në tryezë. Ato mund të jenë sheqerna natyralë, si mjalti, ose artificiale, që i gjejmë te produktet në supermarket.
Ndryshe nga sheqernat që gjenden natyrshëm në fruta, te qumështi, perime, bukë dhe drithëra të tjera, sheqeri i shtuar në ushqime nuk duhet të jetë pjesë e dietës së fëmijës suaj.
Mirëpo, lind pyetja “pse”. Ushqimet dhe pijet me shumë sheqerna të shtuara ofrojnë shumë kalori – të referuara si “kalori boshe” – dhe pothuajse asnjë lëndë ushqyese.
Ofrimi i ushqimeve me sheqer të shtuar për fëmijët nga lindja deri në 24 muaj është problematike, sepse ata hanë sasi relativisht të vogla ushqimi në këtë fazë.
Pra, që ata të kenë një dietë të shëndetshme, ushqimi që hanë duhet të jetë i pasur me lëndë ushqyese. Nëse fëmijët e vegjël ngopen me ushqime të pasura me kalori dhe sheqer, ata lënë më pak vend për ushqime me vlera ushqyese.
Gjithashtu, fëmijët që ushqehen me sheqerna të shtuar kanë më shumë gjasa të kenë një sërë pasojash negative shëndetësore ndërsa rriten, duke përfshirë obezitetin e fëmijërisë, sëmundjet kardiovaskulare dhe prishjen e dhëmbëve.
Ushqyerja nga lindja deri në 24 muaj gjithashtu formon preferencat dietike afatgjata. Pra nëse fëmija mësohet me sheqerna ka gjasa që të ketë këtë stil jetese edhe kur të rritet. Gjithashtu, vendosja e modeleve në fillim të jetës së një fëmije mund t’i ndihmojë ata të mbajnë një peshë të shëndetshme dhe të shmangin sëmundjet kronike.
