Pas kryeqytetit një tjetër vend ku mund të ndjeni atmosferën festive është edhe qyteti i Korçës. Shpirtin e festave të Krishtlindjeve dhe Vitit të Ri e ndjeni edhe në rrugicat e qytetit të cilësuar si “Parisi i vogël”.
Qytetarët kanë një aftësi të rrallë: ata dinë të festojnë më së miri të gjithë bashkë! Një traditë e hershme kjo. Po të jeni aty, do të shikoni me sytë tuaj se që prej datës 19 dhjetor, qyteti do të mbushet me turistë, të cilët kanë vendosur të kalojnë në këtë qytet pushimet e dimrit.
Panairi i poçerisë
Ai ndodhet në parkun kryesor të qytetit. Që prej viteve 20-të të shekullit të kaluar, atje zhvillohet panairi i poçerisë, një traditë e kthyer sërish. E ku ka më mirë se kur tradita mbizotëron në ditët kur ka më shumë turistë! Panairi qëndron i hapur në gjithë javën e festës.
Panairi i dhuratave
Edhe dhuratat e Krishtlindjeve mund t’i blini në një tjetër panair ngjitur me të parin. Aty ka sende, ornamente dhe detaje festive, me të cilat korçarët zbukurojnë shtëpitë, ndërsa turistët i marrin si kujtim.
Fotografi me babagjyshët
Askund përveçse në Korçë, ju nuk do mund të shikoni dhjetëra babagjyshë të shpërndarë nëpër rrugë. Bashkia e qytetit ka vendosur që gjithë javën e festës në rrugë e rrugica të jetë i pranishëm Babagjyshi i Krishtlindjeve.
Katedralja
Koncerte e grupe të ndryshme artistike do të performojnë në rrugë. Besimtarët e devotshëm patjetër që do të mbushin kishën më të madhe të qytetit, ndërsa mjaft të tjerë do të adhurojnë festën në shesh.
