Fotoja e protestuesit për Teatrin Kombëtar, e cila bëri jehonë në media, është krahasuar sot në Kuvend me atë të George Floyd, i cili u neutralizua me dhunë nga policia dhe vdiq nga asfiksimi, pasi efektivi i vendosi gjurin të qafë!
Deputetja e opozitës së re, Fatjona Dhimitri e cila bëri krahasimin, tha se një gjë e tillë ka shkaktuar protesta në të gjithë SHBA-në dhe policët iu bashkuan protestuesve, ndërsa këtu policët “rrahin protestuesit”.
“Në SHBA u hoqën kapelat dhe u bashkuan policët me protestuesit për vrasjen e afro- amerikanit. Në daljet publike keni thënë “punonjësi i policës ka për detyrë të ushtrojë dhunë në dobi publike”. Keni përdorur më shumë se një herë fjalën dhunë. Shteti që ju drejtoni është i dhunshëm dhe për këtë duhen marrë masa. Listën e punonjësve të pranishëm së bashku me numrat e identifikimit, vendimet e marra lidhur me veprimet gjatë operacioni. Këtë përgjigje jo vetëm që nuk e mora, por ju përmes përgjigjeve tuaja vazhdoni të shtoni edhe më tej dyshimet se ishin nga individë të strukturave kriminale”, shprehet Dhimitri.
Nga ana tjetër, Lleshaj iu kundërpërgjigj dhe tha se policia nuk ushtroi dhunë, por vetëm shtrëngim fizik, ndërsa shtoi se veprimet e saj u legjitimuan nga gjykata. Sa i përket numrave në uniformë, ministri, referuar SHBA-ve tha se edhe në vendin më demokratik efektivët nuk kanë numra, pasi përgjegjësinë e mban drejtuesi për gjithçka.
“Keni raste edhe në vendin më demokratik të botës, nuk do të shihni numra të policëve në protesta. Të gjithë barrën për policinë e ka drejtuesi i tyre. U jap emrin e drejtorit të Tiranës, policisë së shtetit dhe po deshët përgjegjësinë time. Ka qenë edhe një pyetje për median, policia nuk njeh hierarki, askënd përvec ligjit. Atë ditë ka pasur dy incidente, nuk kanë qenë si përfaqësues të medias, por kanë penguar me dorë punonjëse femra gjatë kryerjes së detyrës. Kjo përbën vepër penale dhe këtë të drejtë s’e ka as media dhe as ministri” tha Lleshaj.
Ministri shtoi se policia mund të zbatonte një detyrim ligjor, ose të mos e zbatonte atë dhe “policia zgjodhi të parën”:
“Kishte vetëm dy, ose të shkonte e t’i përgjigjej kërkesës së bashkisë për mbështetje, ose ta refuzonte atë”.
/Iconstyle.al
