Klodian Rasha ishte një i ri 25 vjeçar i cili u vra në Tiranë nga një efektiv i Policisë së Shtetit më 8 dhjetor 2020.
Rreth orës 01:45 të datës 8 dhjetor 2020, në rrugën “Dritan Hoxha” në Tiranë, një patrullë policie përpiqet të ndalojë një të ri 25 vjeçar, pasi sipas patrullës po kryente veprime të dyshimta ,si dhe kishte shkelur Aktin Normativ për ndalimin e lëvizjes pas orës 22:00 për shkak të pandemisë së COVID-19.
I riu, Klodian Rasha, nuk iu bind urdhrit të policisë për të ndaluar dhe u largua me vrap. Polcia u vu në ndjekje të tij dhe më pas në një moment oficeri i policisë Nevaldo Hajdaraj e qëlloi të riun me dy plumba, një në shpatull dhe një në kokë, duke e plagosur rëndë. Klodiani më pas ndërroi jetë në spital.
Pas kësaj ngjarje të rëndë qindra persona morën pjesë në një protestë, ku kërkuan drejtësi për Klodianin.
Duke qenë se ngjarja ishte delikate, protestat nuk ishin paqësore.
Të pandehurit Kliton e Klodian Rexha, Serdar Reçi e Mariglen Kuqo u fajësuan për veprat penale të “organizim dhe pjesëmarrje në grumbullime e manifestime të paligjshme”, “kundërshtimi i punonjësit të policisë së rendit publik” dhe “pengimi i qarkullimit të mjeteve të transportit”, të kryera në protestën e 10 dhjetorit 2020.
Gjykata dënoi me nga një vit burg tre prej tyre dhe 6 muaj për të katërtin, ndërsa pezulloi këtë dënim për të pandehurit Reçi e Kuqo.
Prova kryesore e prokurorisë në procesin gjyqësor kanë qenë raportet e shërbimit e policisë gjatë protestës. Sipas këtyre raporteve, të pandehurit Rexha e Reçi kishin qëlluar me gurë forcat policore para Kryeministrisë dhe se më pas ishin larguar në Drejtim të rrugës “Ibrahim Rugova” duke thyer semaforë, duke djegur kazanë mbeturinash dhe thyer tabelat e rrugëve.
Ndërsa i pandehuri Kuqo kishte qëlluar me mjete të forta drejt policisë tek “21 dhjetori”. Sipas gjykatës, gjatë protestës së 10 dhjetorit 2020 u dëmtuan tabela rrugore, semaforë, ndriccues publikë, xhama të godinave shtetërore e bizneseve private, si edhe një automjet privat.
