Benadia Mançen… do e “zbulojmë” nga pak. Çdo pyetje do na lejojë të mësojmë për atë që e bëjmë thjesht një lidhje mes emrit dhe imazhit. Modelet flasin me mimikë, gjeste dhe gjuhë trupi. Benandia është “zbërthyer” në një pyetësor modest për ta zbritur atë nga faqet e revistave dhe pasarelave e për të na folur nga afër.
Arma më e fortë?
Arma ime më e fortë është fytyra me tipare të rregullta, të theksuara dhe shprehëse, gjithashtu dhe parametrat e duhura trupore. Për një fotomodele është e domosdoshme të karakterizohet nga këto detaje.
Tekat e tua?
Teka..?? Nuk e njoh si fjalë. Kur mua më besohet diçka, bëj maksimumim tim dhe dua ta mbyll me sukses që rezultati të jetë i kënaqshëm nga të gjitha palët sepse vërtetë përpiqem shumë.
Fillimet si fotomodele?
Rrugëtimi im si fotomodele ka nisur që në vitin 2013. Kam marrë pjesë në audicionet e organizuara nga Joni Peçi në “Supermodel of Albania” dhe e them me bindje se që nga aty nisi “suksesi” për mua. Bashkëpunimi im tjetër ishte me “ICON Agency” në vitin 2014. Jam shumë e lumtur sepse jam tejet aktive në evente të ndryshme dhe më bëjnë të lumtur pa masë.
Prova e parë? Si je ndierë?
Ky moment më kujtohet si tani. Duhet të bëja foto që i duheshin profilit tim në “Supermodel”. Isha shumë e pasigurt dhe e ngurtë. Nuk dija se si të lëvizja për t’u futur në psikologjinë e fotos.
Emocionet gjatë shkrepjes së aparatit?
Çdo dalje e imja para aparatit fotografik është një emocion i ri edhe pse janë bërë plot 3 vjet. “Drithërimat” janë të njëjtat, por me një ndryshim; tani jam më profesioniste dhe “luaj” me aparatin.
Puna për një set si është?
Fillimisht mundohem të kuptoj atë që më kërkohet. Përgatitem për temën që përmban dhe përpiqem të futem sa më mirë në personazh. Në photoshoting duhet të aktrosh … Jam gjithmonë e lirshme duke ruajtur natyralitetin tim. Një ndihmë e madhe janë dhe këshillat e fotografit dhe fryma e bashkëpunimit me njëri- tjetrin për të nxjerrë një produkt final të kënaqshëm.
*Marrë nga revista “ICON” nr. 3
