“Rastësia është “Mbreti i Botës”. Duket se kjo fjalë ka funksionuar shumë mirë për modelin e “ICON”, Kristi Haskaj. Gjatë një interviste për “Iconstyle”, Kristi tregon se e gjitha për të nisi rastësisht, por u kthye më pas në një profesion. Ai rrëfen disa nga emocionet, ndërsa tregon për projektin e fundit, rolin e aktorit në një nga serialet më të reja shqiptare.
Si ishte fillimi juaj si model? Ndonjë detaj që ju ka mbetur në mendje në momentin kur i hytë këtij drejtimi.
Fillimi im si model ishte krejt rastësisht. Nuk kam pasur besim që mund të bëhesha model, e gjitha nisi si hobi ime dhe tani është kthyer si një profesion.
Ju kujtohet prova e parë e fotografive? Si u ndjeve…
Po më kujtohet! Në setin e parë fotografik isha pak i emocionuar, por u mundova ta lija veten të lirë dhe të ndiqja udhëzimet e fotografit.
Çfarë mund të na thuash lidhur me emocionet që përjeton gjatë shkrepjes së aparatit?
Gjatë setit ekziston vetëm ti, aparati, fotografi dhe një emocion shumë i bukur, që i lidh të gjitha copëzat bashke në një foto të vetme.
Çfarë ndryshimi ju ka sjellë në stilin e jetës modelingu?
Në stilin e jetës nuk më ka ndryshuar pothuajse asgjë, vazhdoj të njëjtën shkollë dhe punë dhe vazhdoj të eci me këmbë në tokë duke e parë modelingun më shumë si një hobi.
Për herë të parë merrni pjesë si personazh në një serial, mund të na tregoni diçka më shumë për rolin tuaj.
Marr pjesë në serialin më të ri shqiptar “Ti mund të më quash Xhon”. Luaj një rol dytësor, Ditio është emri i personazhit tim, një djalë i llastuar nga prindërit të cilët ia plotësojnë të gjitha tekat.
Si ju ka ndihmuar modelingu në pozicionin e aktrimit?
Ndjehem më i sigurt përball kamerave, pa emocion dhe e kam më të lehtë të ndjek udhëzimet e regjisorit.
Cila mendoni se është arma juaj më e fortë që keni në fushën e modelingut?
Arma ime më e fortë përveç qetësisë që më karakterizon është përkushtimi që i dedikoj edhe detajit më të vogël.
Ndonjë këshillë për bashkëmoshatarët e tu që kanë të njëjtën dëshirë…
Në qoftë se kanë dëshirën dhe përkushtimin e duhur do të arrijnë të ecin në boten e modelingut, por të mos lënë mënjanë angazhimet e tjera.
Burimi: Iconstyle
