19-vjeçarja Xheni Ndreu shkeli në zyrat e agjencisë “ICON” dy vite më parë dhe nuk e mendonte se do të ishte pjesë e shumë eventeve të modelingut. Biondja bukuroshe e nisi karrierën në fushën e modës për të realizuar dëshirën e fëmijërisë, por gjatë dy viteve i ka qëndruar besnike kësaj dëshirë. Ajo ka qenë një nga të përzgjedhurat e agjencisë “ICON” për eventet më të rëndësishme të organizuara, nga spektaklet, eventet e promocionit, apo edhe të bashkëpunimeve me markat më të njohura të modës në Shqipëri. Gjatë intervistës së çlirët që patëm me Xhenin, ajo na shprehu hapur të gjithë pengesat që pati kur nisi këtë rrugë, ndërsa tregon disa nga të “fshehtat” e profesionit, që ajo ka mësuar në këto dy vite.
Si ndodhi takimi jot i parë me modën?
Gjithmonë, si çdo vajzë e një moshe të vogël dhe unë shikoja në televizor rreth modës, modelingut dhe mendoja që dhe unë do të bëhesha si ato, pra e mendoja që në një fare moshe do të provoja të merresha me modë. Dhe në fakt kështu ndodhi. Fillimisht unë fillova të merresha me gjëra të vogla, isha pjesë e klipeve muzikore, në mënyrë që të fitoja një lloj eksperience me kamerën. Në mënyrë të rastësishme në një prej këtyre daljeve njoha një model që ishte pjesë e ICON. U informova se si të isha pjesë e kësaj agjencie. Takimi i parë në këtë agjenci ishte me fotografin, që më cilësoi si një “portret mjaft interesant”. Dhe kështu filloi gjithçka.
Përse të pëlqen modelingu?
Modelingu për mua është thjesht një kapriço e momentit, e bëj thjesht sepse ke mundësi të mira për të njohur njerëz të rinj dhe të krijosh një rreth shoqëror sa më të gjerë. Por nuk kam ndonjë arsye të fortë.
Të kujtohet prova e parë e fotografive? Si ishte…
Prova e parë e fotografive… eh për mua ishte paksa e sikletshme. Nuk mund të them që shkoi keq, por që ishte hera e parë që po bëja një set fotosh profesionale. Kjo ishte ajo që e bënte këtë set të ishte ndryshe nga një foto e zakonshme që bëjmë të gjithë. Gjatë gjithë kohës isha me mendjen në ajër… Mendoja se si po dal në foto, a është mirë ky pozicion që po marr, pra gjatë kohës së shkrepjes së aparatit unë vetëm mendoja, por gjithçka shkoi mirë.
Më trego pak më emocionet që përjetove gjatë sfliatës së parë, prapaskenat…
Sfilatën time të parë nuk e kujtoj me aspak nostalgji pasi është realizuar në një kohë të shkurtër dhe kjo bëri që të mos më dhuronte atë lloj emocioni që unë doja të merrja. Por ajo e cila unë kujtoj ka qenë ecja ime e parë. Sapo kisha nisur modelingun dhe ishte hera ime e parë që isha në konkurrencë. Asnjëherë më parë nuk kisha provuar që të ecja si një modele mbi një skenë përveçse ecjeve që bëja në korridorin e shtëpisë. Pra duhej që të bëja një ecje për të qenë pjesë e një shoë italian. Dola në skenë dhe sfilova, as vetë nuk e dija se si dola, por komentet ishin nga më të bukurat. Një nga komentet ishte dikush që më krahasoi me engjëjt e “Victoria’s Secret” dhe kjo është ajo që më ka emocionuar më tepër.
Çfarë ndryshimi të ka sjellë në jetë modelingu?
Modelingu mund të them që më ka ndryshuar shumë, më ka ndryshuar që të jem më e lirë në gjithçka unë dua duke mos u paragjykuar nga të tjerët.
Ke pasur ndonjë ndikim tek të tjerët?
Në fillimet e mia ka patur, pasi këtu në këtë rreth shoqëror në Shqipëri e paragjykojnë shumë të qenit një modele, por me kalimin e kohës ndryshoi gjithçka duke u mësuar tashmë me faktin që unë jam një modele dhe askush nuk kishte pse të ndikohej nga kjo. Madje ndonjëherë prindërit ndiheshin dhe keq pasi dëgjonin se çfarë thoshin personat e tjerë. Në fakt unë nuk jam person që ndikohem nga paragjykimet. Kështu vazhdova dhe ushqeva dhe prindërit me këtë ide, që dhe ata mos të kishin ndikim se çfarë mendonin të tjerët për punën time tashmë dhe që të më lejonin mua që të bëja një farë karriere.
Çfarë mendon se të bën të veçantë nga modelet e tjera?
Unë u bë gati dy vite që jam pjesë e modelingut dhe kam shkuar deri këtu ku jam tani, sepse jam e veçantë për gjithçka kam në llojin tim. Nuk mund të them ndonjë element apo tipar specifik që më bën të veçantë, pra gjithçka unë kam ose jam më bën të veçantë.
Çfarë ke parasysh gjatë punës për një set?
Gjatë një seti ajo që unë kam parasysh gjithmonë është që të jem vetvetja, që të kem besim në vetvete dhe që asnjëherë të mos i them të pamundurës e pamundur, por gjatë një seti ta bëj të mundur. Janë edhe disa elementë profesional që gjithkush i mëson gjatë përvojës së vet në këtë fushë.
Ndonjë këshillë për bashkëmoshataret e tua që kanë të njëjtën dëshirë, modelingun.
Për ato të cilat kanë ëndërr që një ditë të jenë modele i them që ta provojnë, jini pjesë e kësaj fushe për vetë faktin sepse do të ndjeheni mirë dhe do të mund t’i hapni vetes tuaj rrugë të reja për në të ardhmen. Por kurrsesi nuk do t’ju këshilloja që të mendoni se mund ta ktheni modelingun në një profesion, sepse këtu në Shqipëri ndodh rrallë. Nëse doni të jeni pjesë e kësaj fushe merreni këtë rrugëtim si një aventurë që do t’ju ofrojë kënaqësi.
*Fotografitë nën autorësinë e “ICON Agency”
