Sipas Elon Musk, platforma X është hakeruar. Drejtuesi i rrjetit social tha se ky sulm kibernetik është kryer “me shumë burime”. Sipas tij, është përfshirë një grup i madh i koordinuar, një shtet ose të dyja.
“Kishte (ka ende) një sulm të madh kibernetik kundrejt X. Ne sulmohemi çdo ditë, por kjo është bërë me shumë burime. Është përfshirë ose një grup i madh, i koordinuar dhe/ose një shtet. Po e ndjekim…”
Sipas të dhënave të Downdetector, rreth 40.000 përdorues thanë se s’mund të hynin në platformë. Ankesat arritën kulmin rreth orës 11:00 dhe më pas në 15:00.
Një burim nga industria e infrastrukturës së internetit tha për Reuters se platforma është goditur nga disa valë mohimi shërbimi rreth orës 10:45 të mëngjesit. Këto sulme janë përpjekje për ta mbingarkuar një faqe apo rrjet interneti për të përkeqësuar performancën ose për ta bërë të papërdorshme.
Edhe pse nuk ka informacion të mëtejshëm përveç deklaratës së Musk, nuk është çudi që platforma e tij ka rënë pre e një sulmi të tillë. Multimiliarderi është në qendër të vëmendjes edhe për shkak të rolit që mban në administratën Trump pasi e ka udhëhequr ekipin e tij, “DOGE” që të shkurtojë fonde qeveritare, punë dhe programe të ndihmës ndërkombëtare.
