Çdo tre sekonda në botë, prej osteoporozës, një njeri pëson një frakturë në gjymtyrë apo shtyllë kurrizore. Osteoporoza është një çrregullim apo sëmundje e kockave, të cilat sa vijnë e bëhen më të holla, e humbasin forcën e tyre dhe bëhen lehtësisht të thyeshme. Ato mund të thyhen gjatë lëvizjes apo veprimtarive të ndryshme gjatë ditës, prandaj duhet pasur kujdes, në kohën kur sëmundja ka përparuar shumë. Më të predispozuar për të shfaqur osteoporozën janë femrat, sidomos mbi moshën 40 vjeç apo pas menopauzës.
Veçse, faktorët ushqyes janë shumë të rëndësishëm në parandalimin e kësaj sëmundje. Disa ushqime ndikojnë për mirë, ndërsa disa të tjera e përkeqësojnë!
Fosfori dhe kalciumi janë mineralet më të rëndësishme për të parandaluar apo përmirësuar gjendjen e kockave ndërsa, vitamina D, mundëson përthithjen e këtyre elementëve.
Si të marrim dozën e duhur të kalciumit
Për të siguruar nevojat e përditshme me këtë mineral të domosdoshëm për kockat (800/1000mg) është e rëndësishme që të përfshini në menun e përditshme:
1. Djathërat
Zgjidhni ato me stazhionim të gjatë sepse përmbajnë më shumë kalcium. Djathërat e njomë përdorini 2-3 herë në javë.
2. Peshku
Sardelet, peshku troftë, shpatë, peshku gjel dhe ton janë më të pasurit me kalcium 300mg/100gr.
3. Bishtajoret
Fasulet, bizelet, qiqrat, thjerrëzat, etj. edhe pse janë burim shumë i mirë proteinash bimore, ndihmojnë në pakësimin e humbjes së kalciumit .
4. Qumështi dhe kosi
Janë burim i rëndësishëm i kalciumit, por këshillohet që të merren në formën e skremuar për të larguar yndyrat e këqija.
Ushqimet që duhet të shmangni
Disa fruta apo perime ndikojnë në pengimin e përthithjes së kalciumit nga organizmi. Spinaqi, rrepat, domatet, panxhari, rrushi, kumbullat, të gjitha këto përmbajnë përqindje të lartë të acidit osacilik, i cili duke u kombinuar me disa minerale, formojnë disa kripëra që pengojnë përthithjen e kalciumit.
Sheqeri dhe kripa, pijet alkoolike, mjalti dhe reçeli janë ndikues në përkeqësimin e gjendjes së kockave. Duhet t’i përdorni sa më pak të mundeni!
