Dukesha e Cambridge ka marrë dozën e parë të vaksinës anti-Covid. Ajo është shprehur shumë mirënjohëse, që më në fund i erdhi radha të vaksinohet.
Kate Middleton ka publikuar një foto të saj duke marrë dozën e parë të vaksinës në Muzeun e Shkencës në Londër gjatë ditës së djeshme. Përmes postimit në Twitter dukesha ka falenderuar të gjithë ata që po luajnë një rol të rëndësishëm në këtë proces.
Dukesha Kate Middleton është një nga më shumë se 39 milionë njerëzit në Mbretërinë e Bashkuar që kanë marrë dozën e parë të vaksinës kundër koronavirusit. Më shumë se 24 milionë njerëz kanë marrë edhe dozën e dytë.
Kate Middleton është një nga pjesëtarët e fundit të familjes mbretërore që tregon publikisht se është vaksinuar. Bashkëshorti i saj, Princi William, mori po ashtu dozën e parë të vaksinës në fillim të këtij muaji. Ndërsa i ati i këtij të fundit, Pricni i Wales, ka marrë dozat e vaksinës në muajin shkurt. Kurse Mbretëresha Elizabeth është vaksinuar që në muajin janar.
Kujtojmë se ditën e djeshme Dukesha Kate Middleton pati dhe takim me një vajzë 5-vjeçare e cila vuante nga leucemia. Ajo kishte shprehur dëshirën që të takonte një princeshë në jetën reale të veshur me fustan rozë dhe Kate ja plotësoi dëshirën, duke e ftuar të voglën bashkë me familjen e saj në Pallatin Mbretëror.
