Të shtunën që lamë pas një nga çiftet më të përfolur të momentit Sophie Turner dhe Joe Jonas kurorëzuan dashurinë e tyre për herë të dytë.
Pas dasmës së fshehtë që bënë në Los Angeles ata i thanë “Po” sërish njëri-tjetrit në Francën Jugore.
Edhe këtë herë dyshja u kujdes që dasmën ta mbante larg syrit të mediave dhe duket se ja dolën me sukses.
Ata arritën të mbanin të fshehta detajet e dasmës dhe fotot e para të qarta janë publikuar thuajse një javë pas ceremonisë.
Ka qenë Sophie ajo e cila para pak orëve ka publikuar në profilin zyrtar në Instagram një foto ku shfaqet pranë bashkëshortit të saj.
“Zoti dhe zonja Jonas”,- shkruan aktorja krahas fotos.
Fotoja është shkrepur teksa dyshja ecën drejt altarit dhe në fytyrat e tyre dallohet më së miri gëzimi i madh. Në ditën e dasmës Sophie ka veshur një fustan të bardhë të fryrë, i cili e bën të duket madhështore.
Aktorja ka zgjedhur një makijazh të lehtë dhe flokë me onde që e bëjnë të duket shumë natyrale.
Sophie dhe këngëtari 29-vjeçar fillimisht u takuan në nëntor të vitit 2016 dhe gjatë gjithë kësaj kohe marrëdhënia e tyre ka qenë shumë e komentuar.
