Bashkimi Europian është në diskutim e sipër për krijimin e një “Green Pass” (Kalimi të Gjelbër), që do të lejojë personat e vaksinuar të lëvizin lirshëm në Europë. Por sipas këtyre diskutimeve vetëm vaksinat që janë miratuar nga Agjencia Europiane e Barnave (EMA) do të merren në konsideratë.
Deri më tani EMA ka autorizuar 4 vaksina COVID, BioNTech/Pfizer, Moderna, AstraZeneca dhe Johnson & Johnson.
“Ne duam të krijojmë një certifikatë digjitale ku mund të kesh test negativ PCR, ose që vërteton që ke antitrupa, ose që je vaksinuar me një vaksinë që është aprovuar nga EMA”, ka thënë Ylva Johansson, komisionere e Bashkimit Europian.
Vaksinat që nuk kanë marrë aprovimin e EMA-s thuhet se nuk do të mbulohen nga klauzola e BE-së mbi përgjegjësinë dhe kontrollin e cilësisë së vaksinave.
Komisioneri për drejtësinë, Didier Reynders, e ka bërë të qartë se vendet anëtare të BE-së janë të lira që të vaksinojnë qytetarët e tyre me vaskina të tjera, por ata nuk do të mund të pajisen me certifikata udhëtimi të certifikuara nëse vaksina nuk është nga një prej kompanive të cilat kanë marrë dritën e gjelbër. EMA aktualisht po shqyrton të dhënat në lidhje me vaksinën Sputnik V të Rusisë, si dhe ato nga Novavax dhe Curevac për sigurinë dhe efikasitetin për të parë nëse edhe ato mund të autorizohen.
Certifikata digjitale e gjelbër do të përdoret deri në fund të pandemisë, por vaksinimi nuk do të jetë një kusht i detyrueshëm për lëvizjen e lirë. Certifikata mendohet se do t’i hapë rrugë edhe turizmit, që ka qenë një nga sektorët më të goditur të ekonomisë nga pandemia.
Deri më tani vendet e BE-së që mbështeten tek turizimi si Greqia, Spanja dhe Portugalia e kanë mbështetur sistemin, por Gjermania ka shprehur rezerva sesi mund të funksionojnë këto certifikata.
Pritet që Komisioni Evropian të zbulojë propozimin e tij për certifikatat digjitale të mërkurën e ardhshme, me legjislacionin që do t’i dërgohet Parlamentit Evropian.
