E kishim në dorë kur lexonim gazetën apo mësuam të puthnim dhe e kemi ende, kur po mësojmë t’i ndryshojmë pelenat fëmijës.
E kemi fjalën për orën “Swatch”, markën ikonë që i është përshtatur gjithmonë veshjes, humorit, stinës apo tendencave të momentit dhe vendit ku jetojmë.
Nuk është aspak e habitshme që marka është e lidhur drejtpërdrejt me artin, mjafton t’i hedhim një shikim koleksioneve të kaluara dhe atyre të tanishme për ta kuptuar këtë gjë. Për këtë arsye, nga data 5 deri më 13 prill në Milano, marka zvicerane e orëve hapi ekspozitën “TIME TO ART” në rrugën “Montenapoleone”, në mbështetje të artistëve të rinj.
Rruga luksoze dhe e njohur është kthyer në një shëtitore befasuese, përmes krijimeve të 35 viteve, ku tregohet dashuria që ka “Swatch” për artet.
Një retrospektivë sa argëtuese dhe surprizuese e momenteve më të rëndësishme të markës me përfshirjen e saj në art, inovacion dhe te sportet, e përqendruar në lagjen e dyqanit të parë “Swatch” në Itali.
Të gjithë ata që kanë një lidhje me artin ose e duan atë, janë të mirëpritur të kenë një bashkëpunim me nismën “TIME TO ART”. Një instalacion zbavitës është gati të mirëpresë këdo në një univers surrealist, që lidh kohën, artin dhe njerëzit.
Ndërsa në vijimësi ka një studio fotografike, që pret çdo person të bëhet pjesë i projektit “FACES OF MILAN”. 23 persona të talentuar, mes tyre edhe studentë, kanë pikturuar 24 ora “Swatch”, që do të shfaqen në oborrin e rrugës, pranë dyqanit.
Çdo ditë, një kanavacë bosh “Swatch” është në dispozicionin e publikut për ta dizajnuar, ngjyrosur ose zbukuruar. Ndaj, vendosni orën tuaj “Swatch” dhe bëni një udhëtim në Milano: Është “koha për art”.
