Jemi mësuar që sfilatat të mos zgjasin shumë, por veç kohëzgjatjes, çdo gjë që na fali “Prishtina Fashion Nights” ishte shumë ndryshe! Krijimet e 22 dizjanuesve, 18 kreatorë dhe 4 marka botërore, u paraqitën gjatë dy netëve të eventit përmes 35 modelëve. Një skenë e madhe që ishte përgatitur enkas për evenimentin e modës ku u prezantuan koleksionet pranverë-verë 2016.
Ndoshta deri në këtë pikë nuk do të habiteni! Por risia dhe ajo që e bëri të veçantë natën e dytë ishte pikërisht përfshirja e personave me aftësi të kufizuar. Tre modelet e “ICON Agency” i erdhën pikërisht në ndihmë shoqërisë “Handikos”, duke shoqëruar në skenë të rejat me aftësi të kufizuara që prezantonin veshjet e stilistëve. Adea Mehmetaj, Alesia Noka dhe Lorela Haka u falën emocione të papërshkueshme vajzave që shoqëronin, ndërsa bënë të lumtur edhe familjarët e tyre.
E gjithë sfilata u përcoll me duartrokitje, ndërkohë që spektatorët që i përkasnin këtij komuniteti morën vëmendjen e duhur, duke u përfshirë në fushën e modës dhe të bukurisë për herë të parë. Por modelet e “ICON Agency” prezantuan edhe veshjet nga dizajnues të tjerë duke sjell elegancën dhe profesionalizmin e tyre.
Në këtë event ishin të pranishëm rreth 500 të ftuar, ndërsa për herë të parë u prezantuan edhe tri koleksione për meshkuj. Blodin Karaxha, një nga organizatorët e eventit, tregon për mediat se në natën e parë u shpalosen vellot dhe fustanet solemne nga shtëpitë e ndryshme të modës, kurse nata e dytë pati koleksione me veshje të përditshme që quhej “Ready to Wear”.
Ky është edicioni i tetë i “Prishtina Fashion Nights”, që solli dy mbrëmje të veçanta ku gjithçka i kushtohej modës e të cilës një rëndësi të veçantë i dhanë edhe personazhet publike, që nuk munguan.
