12-vjeçari Isaelo Xhemali u braktis nga prindërit biologjikë, duke u hedhur në koshin e plehrave që kur ishte foshnje. Fatmirësisht zoti deshi që ai të jetonte, duke e ndeshur me një zotëri nga komuniteti rom, i cili e mori në shtëpinë e tij.
Tashmë Isaelo është 12 vjeç, ai shkon në shkollë, mëson shumë dhe tregon se prindërit që e birësuan i do pafund. Kur e mësoi se ishte i birësuar ai nuk e besoi, por më vonë e kuptoi rëndësinë e familjes që e rriti dhe është krenar për të. Ndonëse në kushte të vështira ekonomike Isaleo i di sakrificat e prindërve të tij dhe mundohet çdo ditë duke mësuar, në mënyrë që t’ua shpërblejë mundin që kanë bërë për të.
Isaelo Xhemali: Më dukej e pabesueshme, por pastaj e besova. As i njoh as i kam parë ndonjëherë. Njoh vetëm këta që më kanë rritur. Këta mbeten familja ime, tregon 12- vjeçari në një intervistë për “Syri.net”.
Deri më sot, prindërit biologjikë nuk e kanë kërkuar, por Isaelo thotë se sërish do të zgjidhte të jetonte në këtë familje që e rriti, pavarësisht se nuk i përket këtij komuniteti Babai, i cili e birësoi, Leonard Xhemali rrëfen momentin kur e gjeti Isaelon në kosh.
Leonard Xhemali: Aty te kazanët teksa mblidhja kanoçet e kam gjetur. Pandeha se ishte mace, kur e kam gjetur me erdhi keq dhe kam qarë. E mora dhe e solla këtu.
Familja Xhemali e përbërë tashmë nga 7 anëtarë, mbijeton duke gërmuar çdo ditë nëpër koshat e plehrave të Vlorës. Edhe Isaelo kontribuon në këtë punë, pavarësisht se e ka të vështirë për shkak të shkollës./syri.net
https://www.facebook.com/portali.syri.net/videos/526292901318455/
