Princ Harry është po përballet me shumë kritika pasi deklaroi në librin e tij, “Spare”, se ka vrarë 25 luftëtarë talibanë kur shërbente për Ushtrinë Britanike në Afganistan.
Sipas The Daily Telegraph, që ka marrë një kopje të versionit spanjoll të librit përpara publikimit zyrtar të martën, 10 janar, Harry shkruan: “Numri im është 25. Nuk është një numër që më mbush me kënaqësi, por as nuk më vë në siklet.”
Në një paragraf tjetër, ai citohet t’i ketë përshkruar kryengritësit talibanë si “gurë shahu” që hiqen nga tabela dhe jo si njerëz.
Komentet e princit u kritikuan ashpër nga anëtarët e komunitetit ushtarak, ku figurat kryesore thonë se ato mund të rrezikojnë sigurinë e tij dhe t’i japin ushtrisë britanike një reputacion të keq.
Ish-këshilltari i sigurisë kombëtare në Mbretërinë e Bashkuar, Kim Darroch, tha për Sky News se do ta kishte këshilluar Harry-n të mos bënte deklarata. Koloneli Richard Kemp tha se komentet “njollosën” reputacionin e tij dhe atë të ushtrisë britanike.
Pas deklaratës së princ Harry-t se ai ka vrarë 25 luftëtarë gjatë periudhës që shërbente në Afganistan, ka reaguar një udhëheqës taleban.
Sky News shkruan se Anas Haqqani, një ndihmës i lartë i ministrit të brendshëm taleban i është përgjigjur Princit duke thënë se ata që ka vrarë janë njerëz jo ‘gurë shahu’.
Haqqani shkruan: “Zoti Harry! Ata që vratë nuk ishin gurë shahu, ata ishin njerëz, ata kishin familje që prisnin për kthimin e tyre. Megjithatë nuk ka shumë si ju, që arrijnë të pranojnë krimet e luftës”.
Një tjetër zyrtar taleban i quajtur Suhail Shaheen e ka quajtur krim kundër njerëzimit atë që princ Harry ka bërë.
“Ata ishin luftëtarë të lirisë së vendit të tyre, ju ishit pushtues. Kauza e tyre ishte legjitime. Ata ishin heronj të popullit, por ju ishit armiku i tyre“-tha ai për Sky News.
Shaheen shtoi se Harry duhet të shkojë në gjykatë për ato krime.
Kujtojmë se Harry ka bërë bujë me librin e tij “Spare” ku ndan rrëfime nga jeta e tij e adoleshencës, marrëdhëniet me familjarët dhe shumë ndodhi të tjera të cilat nuk ishin thënë deri më sot për pallatin mbretëror.
