Princesha e Kurorës së Norvegjisë, Mette-Marit, ka thënë se do të donte të mos e kishte takuar kurrë Jeffrey Epstein, duke thyer kështu heshtjen shtatëjavore pasi u zbulua kontaktet e saj me të.
“Ndihem kaq e manipuluar, dhe kur je i manipuluar, nuk e kupton që në fillim”, tha Mette-Marit në një intervistë 20-minutëshe në të cilën shpesh ishte në prag të lotëve.
Shtatë javë më parë, norvegjezët zbuluan se princesha e kurorës kishte shkëmbyer qindra email-e me Epstein midis viteve 2011 dhe 2014, dhe qëndronte në shtëpinë e tij në Florida kur ai nuk ishte aty.
“Është jashtëzakonisht e rëndësishme për mua të marr përgjegjësinë për moskontrollimin më me kujdes të të dhënave të tij“, tha ajo.
“Dhe të marr përgjegjësinë që jam kaqe manipuluar dhe e mashtruar sa isha.”
Ajo tashmë ka kërkuar falje dhe ka pranuar se ka “gjykuar dobët”, pasi natyra e ngushtë e lidhjeve të saj me Epstein doli në dritë kur miliona dosje të Epstein u publikuan nga departamenti i drejtësisë i SHBA-së në fund të janarit.
“Sigurisht që do të doja të mos e kisha takuar kurrë”, tha princesha për transmetuesin publik NRK, duke theksuar se ishin viktimat e Epstein ato që meritonin drejtësi për abuzimin e madh që kishin pësuar.
Ajo tha se ndjente një zemërim të madh që ato ende nuk e kishin marrë atë. Vendimi i saj për të folur publikisht vjen pas shqyrtimit intensiv dhe presionit për të shpjeguar veten, përfshirë edhe nga kryeministri Jonas Gahr Støre.
Princesha e kurorës nuk zbuloi shumë gjatë bisedës dhe disa nga përgjigjet e saj u dukën si mbrojtëse.
E ulur pranë bashkëshortit të saj, Princit të Kurorës Haakon gjatë intervistës, Mette-Marit pohoi se “nuk e dinte që ai ishte një shkelës seksual ose një grabitqar”, edhe pse gazetarja theksoi se një artikull në Wikipedia mbi Epstein në atë kohë e kishte bërë të qartë se ai ishte një abuzues i dënuar.
Ajo pranoi se i besonte shumë Epsteinit, por kur u pyet pse as pallati dhe as ministria e jashtme nuk dinin për lidhjet e saj me të, ajo tha se ai ishte një “kontakt privat” dhe se nuk u tregonte të gjithëve për kontaktet e saj private.
E pyetur pse kaloi disa ditë në shtëpinë e Epstein në Palm Beach në vitin 2013, ajo shpjegoi se kjo ishte për shkak të një të njohuri të përbashkët të paidentifikuar. “Epstein ishte mik i ngushtë i një miku tim të mirë”, tha ajo.
