Kim Kardashian ka qenë në qendër të vëmendjes mediatike gjithë këto kohë, pasi bëri kërkesë për divorc nga Kanye West në muajin shkurt. Ndërkohë së fundmi ylli i “Keeping Up With The Kardashians” është përfshirë në një situatë të pakëndshme.
Një 24-vjeçar ka tentuar të hyjë me forcë në shtëpinë e Kim, duke pretenduar se është bashkëshorti i saj. Megjithatë përpjekja e tij për të hyrë në rezidencën e yllit të televizionit ka dështuar, sepse ai është penguar menjëherë nga rojet e sigurimit të Kim Kardashian. Sipas TMZ ngjarja ka ndodhur mbrëmjen e 24 shkurtit, që ka siguruar edhe deklaratën që 24-vjeçari ka bërë në polici. Ai është shprehur se ka shkuar në shtëpi për të parë Kim dhe madje ka pretenduar se është bashkëshorti i saj.
Një burim pranë Kim Kardashian ka thënë për “E! News” se rojet arritën ta ndalonin në kohë të riun për të hyrë në shtëpinë e yllit të televizionit dhe se ai u arrestua menjëherë.
Ndërkohë kujtojmë se mediat e huaja kanë zbuluar së fundmi nga letrat e divorcit arsyen e vërtetë të ndarjes së Kim dhe Kanye. Kim Kardashian ka cituar në kërkesën e saj për divorc se arsyeja e ndarjes mes tyre janë “diferencat e papajtueshme”. Në letrat e divorcit, të siguruara nga “The Sun” gjithashtu konfirmohet se ajo po kërkon kujdestarinë për 4 fëmijët e saj, North, 7 vjeçe, Saint 5 vjeç, Chicago 3 vjeçe dhe Psalm 1 vjeç.
