Kryeministri Edi Rama ka shkuar përtej kërkesave të studentëve që po protestojnë prej 7 ditësh tashmë, para Ministrisë së Arsimit.
Në një video live, kreu i qeverisë u ka premtuar të gjithë atyre studentëve që kanë një mesatare të lartë, se tarifën e studimeve do t’ua paguajë shteti. Ndërkohë për ata që nuk kanë fare mundësi ekonomike, Rama premtoi ndihmë ekonomike.
“Jam i gatshëm për të shkuar më tej kërkesave tuaja për tarifat. Jo vetëm 50%, por t’ua subvencionoje shteti 100% atyre me 9-ta dhe 10-ta dhe atyre në ndihmë ekonomike. Por ama duhet dialog, se nuk zgjidhen në eter”, u shpreh Rama.
Në këtë komunikim “live”, Rama e cilësoi refuzimin e studentëve për të dialoguar, si një e dhënë që nuk tregon gjë tjetër përveçse protesta është e politizuar.
Ai u shpreh se qeveria është e gatshme t’ua përmbushë kërkesat studentëve “që nuk janë në rrugë për Lulin dhe Monikën”, por gjithnjë duke i qëndruar linjës logjike:
“Tarifat jemi gati t’i rishikojmë, jo tarifat por ndihmën e shtetit dhe qeverisë për ju. Tarifa do jetë siç është, ndërsa ne do t’ju japim nga buxheti 50% të saj. Por atyre që janë me 9-a dhe 10-a pse të mos ua paguajmë tarifën të gjithë? Pse? Pse të mos ua heqim tarifën atyre që vijnë nga familje me ndihmë ekonomike? Pse vetëm 50%? Pse të jetë njësoj si për ata që rrinë natë e ditë mbi libra dhe me ata që rrinë në kafene? Unë nuk mendoj kështu. Por si ta zgjidhim, me TV? Dhe çfarë t’ju sugjerojë ju Luli, Monika, apo ai Qorri… Por ama duhet dialog, se nuk zgjidhen në letër”.
/Iconstyle.al
