Për pak ditë bëhet plot një muaj nga tërmeti i 26 nëntorit që shënoi 51 viktima dhe dëme të pallogaritshme materiale. Mirëpo duket se bilanci i dëmeve si njerëzore ashtu dhe materiale mund të vijojë të thellohet, duke qenë se në zona të shumta situata vijon të jetë kritike. Ky është rasti i fshatit Marqinet 1 në Bashkinë Vorë, ku disa familje duket se janë lënë tërësisht në harresë nga institucionet shtetërore.
Besnik Breti, baba i dy fëmijëve 10 dhe 13 vjeç, rrëfen për “iconstyle.al” se që prej tërmetit të parë të 26 nëntorit, i frikësuar për jetën, është vendosur në një strehë të improvizuar me plastmas në oborrin e shtëpisë së bashku me familjen. Por teksa dëmet në shtëpinë e tij janë të dukshme, familja e tij ende nuk është pajisur me një vërtetetim për gjendjen e saj.
“Ka ardhur një komision i përbërë nga dy inxhinierë dhe më thanë futu brenda sepse ka vetëm plasaritje. Sipas mendimit tim, ka çarje. U kërkova firmë që të rikthehem në shtëpi dhe nuk ma dhanë firmën. Që prej 26 nëntorit unë fle në plastmas, nuk më kanë dhënë as çadër.”-shprehet Besnik Breti, teksa na tregon çarjet në banesën e tij.
Bashkëshortja e tij në tregon se dy fëmijët i kanë çuar për të fjetur në çadrën ku është vendosur vëllai i Besnikut, për të mos rrezikuar edhe më shumë shëndetin e tyre në këto ditë të ftohta dhjetori. Ndërkohë në shtëpinë e tyre, gjendja e së cilës ende nuk është vlerësuar zyrtarisht nga një ekspert, vijon të qëndrojë nëna e paralizuar e Besnikut, e cila e ka të pamundur nga ana shëndetësore të qëndrojë në një strehë plastmasi.
I dëshpëruar për gjendjen në të cilën ndodhet familja e tij, Besnik Brati shprehet se nuk kërkon një kontenier, por të paktën t’i jepet një çadër, ndihma më minimale që mund t’u jepet, në mënyrë që që fëmijët të mos detyrohen ta kalojnë dimrin në një strehë palastmasi.
E njëjta situatë paraqitet edhe në shtëpinë e Ahmet Pervizit, shtëpia e së cilit duket se do të shembet nga momenti në moment. Ai gjithashtu nuk ka marrë një dokument që të përcaktojë gjendjen e shtëpisë, edhe pse inxhinierët janë paraqitur në banesën e tyre.
Dy të moshuarit, që prej tërmetit vijojnë të qëndrojnë në një prej dhomave të shtëpisë, me shpresën se një lëkundje e radhës nuk do tët jetë fatale. Ata gjithashtu kërkojnë një çadër për ta vendosur në oborrin e shtëpisë, që deri më tani nuk u është siguruar ende, e mbi të gjitha kërkojnë t’u jepet siguri nga inxhinierët që kanë bërë konstatimet në terren.
Në një komunikim me shefin e Emergjencave Civile për zonën e Vorës, “iconstyle.al” mësoi se në Bashkinë e Vorës ka pasur vonesa përsa i përket pajisjeve me formularët përkatës, ndërkohë që për rastet e identifikuara të shtëpive të pabanueshme, banorëve u është kërkuar të zgjedhin mes një bonusi qeraje, ose një çadre termike.
Vetëm pak ditë më parë, Ministria e Infrastrukturës dhe Energjtikës njoftoi se në Vorë, Shargë, Bërxull, Prezë dhe Marqinet, janë vendosur kontenierë banimi për familjet që kanë humbur shtëpitë si pasojë e tërmetit. Por teksa “iconstyle.al” konstatoi praninë e shumë pak kontenierëve dhe disa çadrave, qartazi situata vijon të jetë alarmante. Shpresojmë që të paktën për familjet që vijojnë të qëndrojnë në shtëpi të pasigurta ndërkohë që sot u regjistrua një tjetër tërmet i fuqishëm në Vorë, të mund t’u sigurohen sa më shpejt çadra për strehim dhe jo kontenierë siç është shprehur ministrja e Infrastrukturës dhe Energjitikës, Belinda Balluku.
