Më në fund pritjes i erdhi fundi! Një nga bashkëpunimet më të bukura të këtij viti, ai mes Alban Skënderajt dhe Arilena Arës do publikohet ditën e sotme.
Nëpërmjet një fotoje të shkëputur nga videoklipi i tyre, të publikuar në rrjetet sociale, dy artistët bëjnë me dije se projekti do lançohet pasditen e sotme në orën 16:00.
Menjëherë fansat kanë shprehur entuziazmin e tyre në komente, pasi si Albani, ashtu edhe Arilena, u bë kohë që nuk kanë publikuar asnjë këngë të re.
View this post on Instagram
Disa ditë më parë ata kanë zbuluar titullin e projektit që është “A i sheh”. Në foton e publikuar prej tyre në rrjetet sociale, ata shihen përballë njëri-tjetrit mbi një kodër.
View this post on Instagram
Klipi është xhiruar në disa zona turistike malore në Kosovë, teksa kujtojmë se kjo është hera e parë që ata bëhen bashkë në një projekt.
Risjellim në vëmendje se pas pjesëmarrjes së saj në festivalin e RTSH me këngën “Shaj”, që doli edhe kënga triumfuese, Arilena nuk ka publikuar projekte të reja.
E njëjta gjë vlen edhe për Albanin, i cili ndryshe nga sa jemi mësuar këtë vit nuk ka qenë shumë aktiv me prurje të reja.
Projekti i tij i fundit erdhi 5 muaj më parë, në bashkëpunim me Elgit Dodën dhe titullohet “Parajsa ime”.
Albani dhe Arilena janë njohur në “X Factor Albania 2”, ku këngëtari ishte pjesë e jurisë, kurse Arilena konkurrente. Ajo ngriti kupën e atij edicioni të kompeticionit, që i hapi asaj rrugën drejt industrisë së muzikës.
Voili, sot ajo po bashkëpunon me Albanin, me të cilin ka edhe miqësi të fortë.
