Rubrika “Ka një mesazh për ty” nga “E diela shqiptare” sot kishte si protagonist Sabjanin, 15 – vjeçarin nga fshat Dushk i Divjakës.
15 – vjeçari tregoi se ka rënë pre e bullizmit në shkollë pasi bashkëmoshatarët e tallin për natyrën e ndrojtur dhe që nuk përdor fjalë të pista për të qënë në modë.
Gjithashtu ai tregon se mësuesit e kanë vënë re këtë fakt, por kanë qëndruar indiferentë.Pas kësaj ai ka provuar të krijojë shoqëri me një vajzë, por ajo i tregonte sekretet e tij gjithë shkollës.
Këtë presion kaq të madh psikologjik adoleshenti e ka reflektuar në shtëpi me nënën e tij, ndaj të cilës ka ngritur shpesh zërin.
“Në shkollë ndihem paksa ndryshe nga të tjerët. Ata kanë tipin të thonë fjalë paksa të pahijshme. Kjo më ka bërë mua pak më të tërhequr dhe kur ata më thonin diçka unë nuk kam kthyer përgjigje. Ndoshta nuk mund t’ua ktheja atyre fjalën dhe ja ktheja mamit në shtëpi, në vend që t’ua ktheja atyre që e meritonin. Për këtë më vjen keq se nuk e kam treguar vetën si në shtëpi ashtu edhe në shkollë. Kam dashur disa herë t’i hapem mamit, por se kam patur guximin, se ajo do të me thoshte pse nuk e ngre edhe ti zërin si të tjerët. Me mësime nuk shkoj mirë, deri në klasë të pestë isha shumë mirë, por këto 3 vitet e fundit jo” – është shprehur Sabjani gjatë emisionit, teksa kishte thirrur të ëmën për t’i kërkuar falje.
“Ti e di që kam shumë gjëra për të të thënë, por meqë kam emocione po i bie shkurt. Të falenderoj për të gjitha sakrificat që ti ke bërë për ne sepse të gjitha problemet i ke kaluar me buzëqeshje. Mbaj mend qëkur isha fëmijë që ti më thoje “Çfarëdo që të thonë njerëzit ti kthejua me buzëqeshje”. Dua të premtoj që do të të ndihmoj me punët në fshat sepse aty ka shumë punë dhe të premtoj që nuk do ta ngre më zërin. Dua të kërkoj falje për gjithçka kam bërë ndaj teje e ty të ka mërzitur” – i tha 15 – vjecari mamasë së tij.
E ëma e pranoi faljen, por tha se ndihej në faj që nuk i kishte kushtuar rëndësi problemit të djalit më herët.
