Disa ditë më parë Post Malone u përball me një incident të papritur në skenë.
Dhe me sa duket plagët e marra nga incidenti i frikshëm nuk janë rikuperuar plotësisht dhe këngëtari është detyruar të marrë mjekim të specializuar sërish.
Ai aktualisht ndodhet në spital me komplikacione nga aksidenti duke anuluar kështu edhe koncertet që kishte planifikuar.
Post Malone anuloi koncertin e tij të planifikuar në Boston një orë përpara se të duhej të fillonte dhe u shtrua në spital.
“Unë e kam shumë të vështirë frymëmarrjen dhe ndjej një dhimbje therëse sa herë që marr frymë apo lëviz”, shkroi këngëtari i “Better Now” në një shënim të postuar në Twitter të shtunën në mbrëmje. “Tani jemi në spital, por me këtë dhimbje, nuk mund ta bëj shfaqjen sonte. Më vjen shumë keq.”
Disa ditë më parë këngëtari, Post Malone i ka shqetësuar të gjithë teksa është rrëzuar keqazi në skenë.
Reperi ndodhej në St.Louis me turneun e tij “Twelve Carat Tour”, kur teksa po performonte, këmba i ngeci në një vrimë në skenë duke rënë dhe përplasur kokën në tokë.
Mjekët dhe sigurimi vrapuan drejt tij, duke e dërguar me urgjencë në spital. Pas mjekimeve të nevojshme, Malone mendoi se u shërua duke riprogramuar sërisht koncertin e tij për këtë fundjavë, por me sa duket gjendja e tij është më e rëndë nga sa dukej.
