Sot në mëngjes iconstyle.al raportoi një rast tepër flagrant të shkeljes së ligjit në Malin e Robit, aty ku ligji me sa duket nuk është i vlefshëm për të gjithë!
Ndonëse kemi folur gjithnjë për krizën ekonomike që pas tërmetit dhe pandemisë, dhe nevojën për rimëkëmbjen e bizneseve, sërish nuk mund të mbyllim sytë kur një biznes në Tiranë gjobitet me miliona lekë, ndërsa një tjetër në bregdet ia hedh paq!
Rasti i sotëm që u raportua nga Mali i Robit, tregonte sesi “Prestige Resort” ka vijuar me muzikë dhe party deri pas mesnate, ndërkohë që policia jo vetëm që ishte e pranishme aty, por kishte marrë edhe telefonata nga qytetarë që i shqetësonte muzika e lartë.
Por çfarë bëri “policia që duam”? Një automjet policie që shfaqet në pamjet e siguruara nga iconstyle.al, kaloi pranë resortit para orës 2:00 të mëngjesit dhe nuk ndërmori asnjë veprim për të ndaluar shkeljen e ligjit. I njëjti automjet shihet teksa kalon sërish pak më vonë duke i rënë njëherë sirenës sa për paralajmërim, për të vijuar më tej me patrullimin.
“Iconstyle.al” kontaktoi Komisariatin e Policisë në Kavajë me shef Sali Skurën, për të pyetur në lidhje me patrullën, targën e së cilës e disponojmë bashkë me pamjet, por askush nuk denjoi të përgjigjet në numrin e vënë në dispozicion për qytetarët.
Më pas telefonuam edhe SHÇBA, me drejtues Muhamet Rrumbullakun, në numrin 0800 9090 i cili duhet të jetë gjithnjë në gatishmëri për qytetarët, por as atje nuk u përgjigj njeri.
Në pamundësi për të gjetur një zgjidhje e vumë në dijeni edhe Ministrin e Punëve të Brendshme, Sandër Lleshaj.
Në një kohë që jemi në mes të sezonit turistik dhe në mes të pandemisë, është e trishtë kur e mendon se ankesat e tua nuk ka kush i dëgjon! Aq më tepër që shkeljet vijojnë të reklamohen në rrjetet sociale, si pa gjë të keq.
Policia që duam nuk është vetëm ajo që gjobit bizneset familjare, dhe i reklamon në faqet e internetit këto veprime si për të thënë se jemi në krye të detyrës dhe nuk i tolerojmë shkeljet, por është ajo që e zbaton ligjin njësoj për të gjithë.
Iconstyle.al bën thirrje publikisht të ndërmerren masa për aktin e papërgjegjshëm të patrullës së djeshme në Malin e Robit, e cila pavarësisht ankesave me telefonata që raportonin muzikën e lartë që i la pa gjumë banorët në këtë zonë, nuk bëri asgjë!
