Drejtori i Përgjithshëm i Policisë, Ardi Veliu, i kërkoi disa ditë më parë personalisht falje Zaida Çobos, videon e së cilës ndau në rrjet duke u shprehur “Shikoni ç’farë familjeje ka djali”. (Lexo këtu)
E ëma e 15-vjeçarit i cili u dhunua barbarisht pasi shkeli karantinën, ka ngritur padi ndaj Veliut, pasi pamjet në video ishin gjatë xhirimi të një filmi.
Megjithëse Drejtori i Përgjithshëm i ka kërkuar falje, Zaida ende nuk e ka vendosur nëse do ta tërheqë ose jo padinë.
E ftuar në emisionin “Shqipëria Live”, Zaida Çobo, ish-banore e “Big Brother Albania 8”, ka shprehur edhe njëherë dëshirën për t’u bërë police, të cilën e ka pasur prej kohësh.
Megjithëse policia i dhunoi barbarisht të birin, Zaida vazhdon të shpresojë se do të futet në polici dhe ende ka shpresë se disa ligje dhe nene mund të ndryshohen.
“Unë jam qytetare e këtij vendi dhe pse jo të mos ndryshojmë disa ligje dhe nene. Unë bazohem tek një qytetare para shumë dekadave në Amerikë, e cila ndryshoi ligjin rrugor vetëm nga incidenti që i ndodhi fëmijës së saj.”- u shpreh ajo.
Gjithashtu, e ëma e 15-vjeçarit përmendi faktin që ishte takuar edhe më herët me Veliun dhe në fakt ky i fundit ia kishte rikujtuar këtë episod.
Takimi kishte ndodhur kur Zaida i kishte shkuar në zyrë për t’u ankuar, pasi për 2 pikë nuk kishte kaluar testin për t’u futur në polici.
