Policia e Los Anxhelosit ka njoftuar se Nick Reiner, 32 vjeç, konsiderohet përgjegjës për vdekjen e prindërve të tij, Rob Reiner dhe Michele Singer Reiner. Autoritetet nuk kanë dhënë ende detaje të plota mbi rrethanat apo motivet që çuan në vdekjen e çiftit, ndërsa hetimet vijojnë.
Sipas policisë, efektivët u thirrën në banesën e familjes Reiner, në zonën e Brentwood, rreth orës 15:40 të së dielës, pas një njoftimi emergjent. Në vendngjarje u konstatua se Rob dhe Michele Reiner kishin humbur jetën dhe se bëhej fjalë për një ngjarje kriminale. Pas disa orësh kërkime, Nick Reiner u lokalizua dhe u arrestua rreth orës 21:15 të së njëjtës ditë.
I dyshuari ndodhet aktualisht në paraburgim pa të drejtë lirimi me kusht. Sipas të dhënave paraprake nga sistemi i burgjeve, më herët ai ishte mbajtur me një garanci prej 4 milionë dollarësh, por autoritetet kanë vendosur që të mos lejojnë lirimin e tij deri në përfundimin e procedurave të mëtejshme ligjore. Nuk është bërë e ditur ende nëse Nick Reiner ka punësuar një avokat për ta përfaqësuar në këtë çështje.
Rasti pritet t’i referohet Zyrës së Prokurorit të Qarkut të Los Anxhelosit, e cila do të shqyrtojë provat dhe do të vendosë për ngritjen e akuzave zyrtare. Seanca e parë pritet të zhvillohet të martën.
Ndërkohë, familja Reiner nuk ka dhënë asnjë deklaratë publike lidhur me ngjarjen. Zëdhënësi i familjes ka refuzuar të komentojë, duke theksuar se prioritet mbetet respektimi i privatësisë në këtë moment të vështirë. Hetimet vazhdojnë për të sqaruar plotësisht rrethanat e kësaj ngjarjeje tragjike.
