Një 20-vjeçar nga Tennessee ka mbetur i vdekur pas një rrengu, të cilin dëshironte ta xhironte dhe ta publikonte në kanalin e tij në “Youtube”. Sipas një deklarate për shtyp nga autoritetet në Nashville, youtuber-i i njohur si Timothy Wilks është qëlluar në një vend parkimi ditën e premte.
Policia ka thënë se Wilks dhe një shoku i tij, i cili nuk është identifikuar ende, dyshohet se i janë afruar një grupi njerëzish me thika në duar. Sipas informacioneve të policisë, Wilks dhe personat e tjerë po planifikonin që të organizonin një grabitje të rreme si pjesë e një videoje që do e publikonin më vonë në Youtube. Mirëpo gjatë këtij momenti 20-vjeçari është qëlluar dhe ka mbetur i vdekur në vend.
Kur autoritetet kanë arritur në vend, personi që ka qëlluar Wilks është shprehur se ai ka qëlluar për vetëmbrojtje dhe se nuk ishte i vetëdijshëm se ajo ishte thjesht një reng. Për këtë arsye deri më tani ai nuk po përballet me asnjë akuzë. Nga ana tjetër policia po punon ende për të investiguar pretendimet e tij se vrasjen e bëri për vetëmbrojtje.
Gjithsesi vrasja e 20-vjeçarit ngre sërish shqetësimin se trendet në rrjete sociale përbëjnë një problem të vërtetë për shoqërinë e sotme. Ky nuk është rasti i parë që përfundon me tragjedi, pasi shumë persona të tjerë janë përfshirë në skema të tilla tepër të rrezikshme dhe ekstreme.
