Ke ardhur nga pushimet dhe nuk je nxirë sa duhet?! Vështirë të gjesh “mëkat” më të madh në sezonin e verës. Sytë e shoqeve janë te ty, i dashuri nuk e ka aspak problem ta thotë troç që “le nam”, por ndonjë batutë prit edhe nga familja. Po t’i mbledhësh të gjithë njëzëri kanë vetëm një pyetje retorike habitore: “Po t’i nuk qenke nxirë fare?!”.
Ndërkohë që t’i ke shfrytëzuar vetëm rrezet më pak të padëmshme të diellit dhe je kujdesur për lëkurën duke e lyer me krem mbrojtës me SPF 30 ose 50. Pavarësisht se ke shijuar ditët e pushimit të plazhit, freskinë, detin e kristaltë të Jugut dhe pijet e ftohta nën hijen e çadrës, vetëm me këmbët zbuluar në diell, për ta rëndësi ka vetëm pyetja pse nuk je nxirë. Ke qëndruar 10 ditë larg tyre dhe çfarë aventurash nuk mund të kesh kaluar, por para lëkurës tënde ngjyrë “kapuçino” dhe jo “çokollatë” nuk ka asgjë rëndësi.
Mania e nxirjes së lëkurës i kap pothuajse të gjithë gjatë verës dhe për këtë mund të sakrifikohet edhe shëndeti. Shikon në rrugët e kryeqytetit vajzat “abronzanta” tregojnë ngjyrën e trupin e tyre duke zgjedhur ngjyrat e veshjeve që e theksojnë, por sfidë tani kanë hapur edhe meshkujt.
Në “Instagram”, “Facebook” apo “Snapchat” dixhitura vërtitet rreth temës: “E puthur nga Dielli” (Kissed by the sun). Të famshmet po e po! Pushimet i kanë nisur që në dimër, seancat e solarit nuk u kanë munguar.
Prit! Më duket se sapo pash një të famshme shqiptare që poston foto dhe është e bardhë?! Eva Murati! Moderatorja në fakt ka dashur që t’i përgjigjet vet pyetjes pse nuk është nxirë shumë, pa e ngacmuar të tjerët. Është vetëm dita e saj e dytë e plazhit!
Pavarësisht kësaj dikush që e vë theksin te dëshira e tij për ngjyrën e lëkurës i bën një vërejtje: “Trup shumë i bukur. Mbase të duhet të nxihesh më shumë”.
Këtu ndoshta kupton që më shumë se sa një dëshirë e papërmbajtur e njerëzve për të marrë ngjyrë mund të jetë një varësi.
Në fakt psikoanalistët na shpjegojnë se ekziston një varësi e tillë e quajtur: tanoreksia. Tanoreksia, neologjizëm që rrjedh nga bashkimi fjalës “tan” (në anglisht nxirje ose abronxaturë) dhe oreksis (nga greqishtja, oreks), është një varësi e re e përhapur së fundmi, që lidhet me marrjen e rrezeve të diellit në mënyrë obsesive dhe që i shtyn miliona njerëz të “theken” në diell, edhe pse nuk ndihen në një situatë të rehatshme.
Gjithnjë e më shumë njerëz ndihen të qetë vetëm nëse shohin një nxirje të theksuar, pa e kuptuar se lëkura po shkatërrohet për shkak të eritemave dhe pezmatimeve të shkaktuara nga dielli.
Sipas psikologëve, rituali i seancave të solarit ose ekspozimi në diell me çdo kusht është si një supersticion, një nevojë e ngutshme varësie. Lëkura duhet të jetë domosdoshmërish e nxirë, pavarësisht nga pasojat. Disa persona kanë një nevojë obsesivë për t’u dukur përherë të nxirë, në çdo muaj të vitit dhe nëse kjo nuk ndodh, provojnë një ndjesi ankthi dhe nuk ndihen mirë me vetveten. Humori, vlerësimi për veten dhe qetësia bëhen menjëherë të varur vetëm prej lëkurën me ngjyrë çokollate.
Karakteristikat kryesore të sindromit “varësi ndaj diellit”:
-personi tanoreksik mendon se nuk është asnjëherë mjaftueshëm i nxirë.
– kënaqësia e një lëkurë të nxirë, për një tanoreksik bëhet një fiksim i vërtetë.
– armiqësi kundrejt kremrave me faktorë mbrojtës ndaj diellit, tendencë për të qëndruar sa më gjatë nën rreze, duke injoruar të gjitha rregullat për një ekspozim korrekt në diell.
– ankth dhe siklet psikik, nëse nuk arrin dot të qëndrojë aq sa do në diell, ose të frekuentojë llampat solare në stinët e tjera.
Kështu, tanoreksikët janë shumë më të ekspozuar ndaj rreziqeve që rrjedhin nga ekspozimi i tepërt nën diell, si djegiet, melanomat dhe plakja e lëkurës.
Identikiti i një tanoreksiku
Edhe pse mund të prekë të dy sekset dhe të gjitha moshat, varësia nga nxirja e lëkurës duket se i takon më së shumti femrave. Dhe varion në moshat nga 25 deri në 54 vjeç, me një lëkurë me bazë të errët, të dobëta, duhanpirëse dhe me një profil solar mesatar.
Jetojnë më së shumti në zonat metropolitane dhe e kanë zakon që të ekspozohen në diell për më shumë se gjashtë orë në ditë, përfshirë këtu edhe ato më të nxehtat, pa u lyer me kremra mbrojtës, por vetëm me solucione që përshpejtojnë nxirjen, si për shembull vaji.
Sa të fiksuar janë italianët?
6 italianë në 10 kanë një tendencë të fortë për të abuzuar me rrezet diellore.
20% pranon rrezikun e shtimit të rrudhave. 17% pranojnë se i merr parasysh rreziqet për të pasur një lëkurë “çokollatë”.
Po në Shqipëri?
Pavarësisht se nuk ekzistojnë statistika, pushimet tuaja ju kanë bërë të kuptojnë se të gjithë janë të fiksuara pas nxirjes, duke qëndruar për orë të tëra para diellit edhe në orët e pikut të drekës. Apo vajzat e ekranit shqiptar të cilat duken sikur janë kthyer nga plazhi çdo ditë, edhe pse mund të jetë mesi i janarit. Ndaj është në dorën tuaj të zgjidhni mes shëndetit dhe nxirjes! Unë zgjedh të parën, më mirë “e bardhë”, me një lëkurë pa rrudha dhe quka!
Burimi: Iconstyle.al
