Ato i bashkoi dhimbja, ose më saktë le të themi, dëshira për ta kaluar atë, duke marrë pjesë në një terapi në grup.
Jen, (Christina Applegate), një grua e ve me dy fëmijë, ka vetëm pak kohë që ka humbur bashkëshortin në një aksident me automjet dhe po e kalon jetën e saj duke parë makina me parakolpin e përplasur për të gjetur shkaktarin/shkaktaren e aksidentit, që përplasi partnerin e saj dhe u largua nga vendngjarja.
Judy, (Linda Cardellini) kishte humbur të dashurin e saj Steve nga një atak në zemër. Ato bëhen mikesha të ngushta dhe nisin një shoqëri për të ndihmuar njëra-tjetrën të kalojnë dhimbjet që po përjetojnë. Por në momentin kur, Jen mendoi se kishte gjetur shoqen e saj më të mirë të jetës, i zbulon asaj një sekret që do të prishë gjithçka. Steve është gjallë, nuk ka vdekur! Por ky nuk është i vetmi sekret që Judy fsheh!
Në fakt, Judy fsheh dy sekrete të errëta që janë thelbi i serialit të ri të javës, Dead to me në Netflix. Njëri del në gjysmën e parë të serialit, kur Jen zbulon se Steve është akoma gjallë. Çifti kishte kaluar një periudhë të vështirë dhe ishte ndarë pas abortit të pestë të Judy-t.
Dy mikeshat i kërkojnë falje njëra-tjetrës pas një sherri dhe Judy zhvendoset në shtëpinë e Jen-it për të vajtuar humbjen në mënyrën e tyre. Sekretin e dytë do ta kuptoni menjëherë pa dashur që t’ju japim një spoiler tani!
Nuk ka asgjë të keqe të vajtosh!
“Dead to me” sjell në mënyrë mjaft emocionale pikëllimin në të gjitha format e tij. Vetë Jen kishte disa probleme emocionale përpara se Ted të vdiste, por pasi ai vdes, tërbimi zë vend në jetën e saj. Ajo vrapon, dëgjon muzikë metal, mban edhe një shkop golfi në makinë për të goditur atë që ia bën për borxh. Kurse Judy, e cila ka pasur aborte të shumta, sjell një tjetër këndvështrim të pikëllimit dhe na tregon se hidhërimi vjen në shumë mënyra, e rëndësishme është të mos kesh frikë ta tregosh atë.
Në qendër të gjithçkaje është miqësia!
Gjëja më e bukur që lind në këtë rrjet intigrash e sekretesh është miqësia. Jude dhe Jen e kalojnë bashkë pikëllimin, ato shkojnë në aventura së bashku, pijnë edhe hashash, zbulojnë tradhti, flasin për mastektominë.
Ti si shikues do të besosh se miqësia është e vërtetë edhe kur ka sekrete në mes, si ai i Jude-t. Pasi të zbuloni se ajo është shkaktarja e vdekjes së bashkëshortit të Jen, krijohet një personazh që mund të jetë shumë lehtë për t’u urryer- por askush nuk e urren atë! Në vend të kësaj, do të shihni se miqësia mbizotëron mbi gjithçka.
James Marsden
Një arsye tjetër përse seriali prej dy sezonesh është argëtues, është James Marsden. Aktori simpatik luan rolin e ish-të fejuarit të Judy-t! Ai është gjithçka që një femër do të dëshironte, i bukur, i pasur, dhe një avokat i zoti, për të mos thënë që është Mbreti i Kalifornisë në shtrat (sipas Judy-t).
Por minusi më i madh është ky, ai është njësoj fajtor si Judy për aksidentin e tmerrshëm që ka pësuar bashkëshorti i Jen. Të dy ishin në automjetin që përplasi Ted-in atë natë dhe kjo i bën njësoj fajtorë por me një ndryshim shumë të madh! Faji gjithnjë peshon më shumë në njërën anë dhe ju do ta mësoni këtë gjatë serialit.
