Prej javësh të rinjtë serbë kanë nisur një fushatë për të quajtur Kosovën Serbi në Instagram.
Ata kanë nisur të shkruajnë “Kosova është Serbi” në kartëmonedhat e 5 euroshe ose 1 dollarëshe dhe më pas për ta bërë edhe më të gjerë këtë fushatë fotot e kartëmonedhave t’i publikojnë në Instagram me hashtagun #Kosoveisserbia.
Kësaj nisme i është bashkuar edhe ministri i Jashtëm serb, Ivica Daçiç, i cili ka shkruar në një kartëmonedhë 100 dollarëshe “Kosova është Serbi”.
Pas kësaj nisme, shqiptarët nuk kanë qëndruar duarkryq. Tashmë në kartëmonedhat euro ka nisur të shkruhet “Kosova është Kosovë”, dhe kjo i ka rënë në sy edhe këngëtarit Alban Ramosaj.
Ai shkruan në Instagram se nga kjo fushatë do të ketë probleme ose zgjidhje. Sipas Ramosajt, kjo gjë ose do të bëjë që Kosova të mos përdorë më euron, ose do të ndërgjegjësojë njerëzit për çështjen e kufijve dhe territorit.
