Teksa i gjithë vendi është duke u përballur me një vështirësi të madhe për shkak të koronavirusit, mjeku i QSUT, Petrit Vargu, tregon se çfarë po ndodh në spitalin e Radiologjisë.
Ai thotë i indinjuar se në këtë spital po bëhet një tender për blerjen e aparaturave për ndërhyrje të mitrës pa gjak.
Por, sipas tij ky nuk është momenti i duhur, pasi në vendin tonë ka ende mungesë të mjekimeve për virusin e ri që po përhapet nga dita në ditë.
Mjeku Petrit Vargu thotë se dikush po përpiqet të përfitojë në këto momente dhe i bën thirrje ministres së Shendetësisë që të marrë situatën në dorë.
“Në një kohë që katundi po digjet, nuk ka fonde e nuk ka materiale, disa drejtorë rilindas, duke përfituar nga situata, tentojnë të blejnë aparatura për ndërhyrje të mitrës pa gjak. Në një vend tjetër prokurohen aparate për përdorimin e qelizave staminale në kardiokirurgji. Disa kilometra më tutje një spital tjetër, megjitse është kthyer në spital Covid, vazhdon prokurimi për aparatura kardiokirurgjie, për shndërrimin në spital që të ketë dhe kardiokirurgji. Në vend që të rregullohet me pak lekë radiologjia, hapet një tender për të blerë radiologji të re e cila minimumi vjen pas 3 muajsh. O ministre, si nuk e more njëherë situaten në dorë? Gjarperinjtë rilindas, duke përfituar nga situata, tentojnë të bëjnë gola. Po nxirr urdhëresa në lidhje me Covidin! Nuk e shikon që e vetmja gjë që po bëhet është riparimi i disa respiratorëve. Mbaje shëndetësinë në këmbë, me shërbime të vogla e të shpeshta. Ndërpreja rrugën golashënuesve!”, shkruan Vargu.
Kujtojmë se pak ditë më parë Vargu tha se në vendin tonë nevojiten më shumë tamponë, ventilatorë dhe filtra në mënyrë që të merren masat e duhura për COVID-19.
Emergjenca shëndetësore në të cilën ndodhet vendi ynë prej gati dy javësh që pritet të pasohet nga një krizë ekonomike për shkak të mbylljes së thuajse çdo aktiviteti, nuk ka ndaluar zhvatjen e vazhdueshme të buxhetit të shtetit nëpërmjet tenderave skandalozë.
Pak ditë më parë u zbulua tenderi i Operatorit të Shpërndarjes së Energjisë Elektrike (OSHEE), për blerjen e maskave respiratore me valvul FPP1, me një shumë prej 12.6 milionë lekësh të rinj.
Për të mos mjaftuar, në mes të pandemisë, Bashkia e Tiranës ka hapur një tender për suvenire duke ofruar një fond limit prej 2.496.200 lekësh.
