Ajo njihet sot si një nga miss-et e para shqiptare që u shndërrua në ikonë bukurie. Por pak e dinë historinë e Valbona Selimllarit, që e shtyu të merrte pjesë në një konkurs bukurie nga i cili do të merrte famë.
Selimllari nuk kishte ndërmend të merrte pjesë në konkurs, pasi kishte shkuar aty vetëm për të shoqëruar shoqen e saj. Por, këmbëngulja dhe intuita e Bledi Gonxhes dhe skenaristit Engjell Ndocaj e ngjitën në skenë.
Këtë gjë, ata e kanë treguar në programin “Fol me mua, fol me ata” të prezantuar nga Enkel Demi.
“Ne ishim një komision që përzgjidhte vajzat. Në spektakël morën pjesë 24, por erdhën 50 apo dhe më shumë fillimisht. Pavarësisht mungesave, ne po e bënim gjithçka në mënyrë shkencore. Një bashkëpunëtorja jonë, femër sigurisht, u merrte përmasat trupore me një metër rrobaqepësie. Kishim marrë edhe një peshore të vogël në ambulancë. E morëm nja 3 herë atë peshore, sa herë kishim faza përzgjedhëse, sepse nuk kishim ku gjenim tjetër. Ndërsa vajzat sfilonin para komisionit me rrobat e tyre të banjës. Ato nuk e kishin problem.
Më kujtohet që në seancën e fundit përzgjedhëse, kishin ardhur pesë vajza. Katër të parat dhanë emrin dhe sfiluan. Ndërkohë ne pamë edhe vajzën e pestë, që ishte shumë simpatike. Dhe i thamë ‘po ti pse nuk e jep emrin?’. ‘Po unë kam ardhur të shoqëroj shoqen time, Aidën’, tha ajo. ‘Po pse nuk merr pjesë dhe ti? Ti je shumë e bukur’, këmbëngulën ne. Ajo ishte e ndrojtur. U përtyp dhe u përtyp, pastaj tha ‘Po, unë nuk kam rroba banje.’ ‘Po mirë merrja shoqes dhe dil’, këmbëngulëm ne. Dhe ajo ia mori shoqes, doli, ishte shumë e bukur dhe ne kërkuam ta regjistronim. Ajo na e dha emrin. Ishte Valbona Selimllari”, kanë rrëfyer ata.
