Komiteti Teknik i Ekspertëve deklaroi ditën e sotme se në vendin tonë mbeten në fuqi të njëjtat masa kufizuese. Edhe pse ishte thënë se “ora policore” do të shtyhej për në orën 18:00, kjo gjë nuk ka për të ndodhur.
“Duket se situata në vend është delikate një situatë që meriton vëmendje por duket se nga shifrat kemi një situatë të qëndrueshme dhe në ditët e fundit ka një tendencë ulje të indikatorit R nga 1.1 në 1.05. Masat që u propozuan para dy javësh kanë dhënë efekt. Ne do të vijojmë të mbetemi aty duke i vlerësuar ngushtësisht në kohë të shkurtër. Pra në masat që vazhdojnë të mbeten në fuqi, është kufizimi i lëvizjes së qytetarëve në orën 20:00, mësim online në gjimnaze”, tha Mira Rakacolli.
Ndërkohë drejtoresha e Shëndetit Publik, Albana Fico, gjatë një lidhje të drejtpërdrejtë me “EuroNews Albania” tha se qëndrueshmëria e pozitivitetit të mostrës dhe fakti që transmetueshmëria është ulur e ka çuar Komitetin drejt këtij vendimi. Ndërsa në lidhje me mostrat e dërguara në Britani për të vërtetuar nëse po qarkullojnë mutacione të virusit në Shqipëri, ajo tha se përgjigja kërkon pak kohë, sepse procedura e analizave është e gjatë.
Megjithatë ajo shtoi se ndryshimet që janë vënë re në sjelljen e virusit janë një provë se në vendin tonë qarkullojnë mutacione të Covid-19.
“E rëndësishme është të kuptojmë se ne kemi tre gjëra që i kuptojmë edhe pa përgjigjen e tyre: kemi pasur mostra të dyshuara, kemi një ndryshim në dinamikën moshore; është një tjetër element që s’e kemi parë me virusin e parë dhe së treti edhe sëmundshmëria ka ndryshuar fytyrë në disa persona. Kjo ngre më shumë dyshime për ekzistencën e tyre, por qëllimi është të ndërpritet zinxhiri i infeksionit”, tha Fico.
