Tarifa e “Roaming”-ut nënkupton telekomunikimin dhe shërbimin që qytetarët e përdorin në një shtet tjetër, nga një qendër e operatorit të telefonisë së lëvizshme.
Kompanitë celulare në Shqipëri kanë gjetur rastin që të abuzojnë edhe më këto tarifa që janë shumëfish më të larta sesa ato që përdoren për telekomunikim në vendet fqinje.
“iconstyle.al” pasi ka konstatuar pakënaqësinë në masë të qytetarëve mbi këtë çështje, realizoi një sondazh, nga i cili konstatuam shkelje ligjore të shumta për të cilat duhet mbajtur përgjegjësitë ligjore përkatëse.
Nga ky sondazh, sikundër do e shihni edhe më poshtë, ‘vendin e parë’ si kompania me më shumë pakënaqësi e mban Vodafone.
Çmime shumë të larta!
Pikë së pari, paketat “roaming” në vendin tonë janë shumë të shtrenjta, krahasuar jo vetëm me vendet fqinje e ato europiane, por edhe me shërbimet që ofrojnë.
37% e pjesëmarrësve në sondazh shprehen se ofertat ‘roaming’ janë shumë të shtrenjta, kurse 29% shprehen se nuk i përdorin ato sepse nuk ia vlejnë. Ndërkohë, 21% e pjesëmarrësve thonë se shpeshherë këto paketa i lënë në mes të rrugës dhe vetëm 13% e tyre shprehen se janë në rregull.
Nëse u hedhim një sy paketave ‘roaming’ të Vodafone vihet re mjaft mirë se sa shumë abuzohet me çmimet. Kështu, paketa që përfshin çdo vend të Europës, kundrejt 300 lekëve të reja, ofron vetëm 300 MB. Ndërsa, nëse do 1 GB duhet të paguash 1000 lekë.
Ndërkohë, matanë Adriatikut, në Itali Vodafone ofron 0.5 GB=500 MB për 1 Euro dhe 1 GB për 2 Euro.
Europa, UK, zerojnë tarifat shtesë për shërbimin “Roaming”
BE ka zeruar tarifat për ‘Roaming’ për të gjithë njerëzit që udhëtojnë brenda BE. Tarifat për ‘Roaming’ janë ulur gradualisht duke filluar nga viti 2006. Që nga 15 qershori 2017, njerëzit paguajnë vetëm tarifat e brendshme, përfshirë këtu edhe shtetin tonë fqinj Greqinë.
E ashtuquajtura ‘Roam like at home’ (endu/shëtit si në shtëpi) u ka mundësuar shtetasve eurpianë të përdorin telefonat e tyre kur udhëtojnë në BE, duke paguar të njëjtat çmime si në shtetin e tyre.
Marrëveshja është produkt i viteve të tëra bisedimesh për të hequr tarifat “roaming” mes vendeve të Bashkimit Europian dhe për të rregulluar trafikun e internetit mes vendeve të unionit.
Mirë që paguajmë më shumë, por paguajmë për një shërbim “ngelës”
Sikur të mos mjaftonte fakti se qytetarët shqiptarë tarifohen shumë për pak, ky shërbim le shumë për të dëshiruar. Ishin të pafundme pakënaqësitë e qytetarëve në sondazh, ku shpreheshin se pothuajse gjithmonë kanë hasur në probleme me ‘Roaming’, ku më së shumti përmenden: 1.Paketa thjesht nuk funksionon dhe 2.Minutat, SMS dhe MB/GB më parë mbrarohen sesa aktivizohen.
Po për në Kosovë përse paguajmë?
E habitshme është se paketat ‘Roaming’ me Kosovën janë ende aktive në një kohë kur në 2018 u vendos që qytetarët shqiptarë nuk do të paguajnë tarifa shtesë për përdorimin e celularit në Kosovë dhe e njëjta gjë do të ndodhë edhe me qytetarët e Kosovës kur vijnë në Shqipëri.
Komisioni për Veprimtaritë Prodhuese, Tregtinë dhe Mjedisin, në prani edhe të përfaqësuesve të Ministrisë së Energjisë dhe Infrastrukturës dhe Autoritetit të Komunikimeve Elektronike dhe POstare (AKEP), në cilësinë e komisionit përgjegjës miratoi projektligjin “Për një shtesë në ligjin nr. 9918, datë 19.5.2008 “Për komunikimet elektronike në Republikën e Shqipërisë”, të ndryshuar.
Në datën 30 maj të atij viti, Kuvendi ka miratuar një rezolutë për heqjen e ‘Roamingut’, pasi një gjë të tillë e ka bërë edhe Kosova. Ndërkohë, u gjykua që të kalohet me një propozim konkret dhe të miratohet në Parlament heqja e ‘Roamingut’ nëpërmjet një ligji. Kjo përfshin edhe tarifat e shërbimeve të lidhura me ‘Roaming-un’ ndërkombëtar. Ky ndryshim ligjor mundëson që ‘Roaming’ të hiqet edhe me vendet e tjera.
Mirëpo, sapo të kalosh kufirin me Kosovën asnjë valë e kompanisë celulare shqiptare nuk do depërtojë në telefonin tënd. Ndërkohë, skandali thellohet edhe më tej nga fakti se këto paketa nuk funksionojnë as në Kosovë.
Pjesëmarrësit në sondazh të pyetur rreth këtij fakti kanë treguar se këto paketa në Kosovë i lënë në baltë dhe se nuk funksionojnë. Përgjigja e madhe e pyetjes “Pse” është e thjeshtë: Vodafone nuk ka investuar në zgjerimin e infrastrukturës në Kosovë, qoftë në vendosjen e antenave, qoftë në bashkëpunimin me kompanitë vendase.
Pak ditë më parë në fakt ju treguam se edhe mbulimi i zonave të veçanta të vendit me rrjet të shërbimeve celulare mbetet një problem ende në vitin 2020. Bëhet fjalë kryesisht për zona larg kryeqytetit dhe qyteteve të mëdha, ku operatorët nuk kanë interes ekonomik për të vendosur rrjetet e tyre të shërbimit, për shkak të numrit të pakët të abonentëve. (KLIKO)
BE: Ulni tarifat e ‘Roaming’
3 vite më parë Komisioni Europian u ka propozuar qeverive të shteteve ballkanike perëndimore që të ndërmarrin masa të përbashkëta për unifikimin e tarifave “roaming”, për thirrjet telefonike hyrëse dhe dalëse drejt vendeve anëtare të Bashkimit Europian.
Aso kohe komisionerja europiane e Ekonomisë Dixhitale dhe Shoqërisë, Mariya Gabriel e ka bërë publike këtë kërkesë gjatë një takimi me ambasadorë të bllokut europian në 6 vende të rajonit.
Njehsimi do të thotë që shfrytëzuesit e shërbimeve të telekomunikacionit në rrjetet e telefonisë jashtë atdheut të tyre do të paguajnë çmime si në vendet e tyre, ashtu siç ndodh që nga 15 Qershori me qytetarët e BE-së.
